Durrës (Ussprooch: [ˈdurəs]; bestimmti Form im Albanische: Durrësi; griechisch: Δυρράχιον Dyrrhachion; latiinisch: Dyrrachium; italienisch: Durazzo) isch e Stadt in Mittelalbanie aa de Adria. Es isch mit über 200.000 Ywohner nooch de Hauptstadt Tirana di zweitgrööschti Stadt vo Albanie un di wichtigscht Hafestadt vum Land.

Mit sym Hafe isch Durrës eis vo de wichtigschte Wirtschaftszentre vo Albanie. De Hafe isch d wichtigschti Handelsverbindig zum Ussland un bsunders nooch Italie. Täglich faare Fääre vo Durrës uff Italie. Usserdäm het Durrës no e Werft. Dernäbe isch d Stadt au en Stroose-un Ysebahnchnotepunkt.

De Durrës Plazh, de Strand vo Durrës, ghört zue de beliebteschte Badeplätz vo Albanie. Bsunders im Summer spiilt de Tourismus wäge däm e wichtigi Roll. D meischte Urlauber sin Usslandsalbaner un Kosovare, oder chömme uss de Hauptstadt Tirana uff Durrës.

S Klima z Durrës isch mediterran. Am niidrigschte sin d Temperature im Januar mit durchschnittlichi Höggschtwärt vo 5°C i de Nacht un 12°C am Daag. Am wärmschte sin de Juli un de Auguscht mit Durchschnittstemperature vo 21°C i de Nacht un 28°C am Daag.

Wäge synrer lange Gschicht het Durrës mehreri archäologischi Fundplätz. Am wichtigschte devo isch e Amphitheater, wo au Mosaike bsichtigt werde chönne. Es isch im 1. Joorhundert n.Chr. baut worde, un isch mit enere Kapazität vo 20.000 Mensche s gröschti uffem Balkan. Im Archäologische Museum sin verschidni Fundstugg uss de Gschicht vo de Stadt ussgstellt.

Dernäbe isch vorallem de Strand vo Durrës e beliebts Ussflugziil.

1. ↑ Infos über die Kommunalwahlen 2007