O cachirulo^[1] u cacherulo^[1] ye una prenda clasica y distintiva d'o trache masculín tradicional aragonés. Consiste en un mocador de colors que va endoblau y anyudau en o tozuelo de l'hombre (no pas d'a muller) encara que sin cubrir-la de tot sino rodiando-le a frent a modo de faixa. O nombre cachirulo orichinalment nomás s'emplegaba en una parti d'Aragón, en atras zonas se conoixeba como mocador merino^[1].

O cachirulo tien un orichen clarament musulmán y fue conservau por os moriscos dica o sieglo XVII.^[2]

O modelo mas popularizau en l'actualidat ye o formau por cuadros royos y negros. Menimenos, tradicionalment a tipolochía yera muit variada, dende atras combinacions de colors como azuls y negros u moraus y negros, dica cachirulos lisos, a rayas u con flors. Os cachirulos moraus y negros se gosan asociar por un regular con a provincia de Teruel.

I hai dos formas de anyudar-lo, a mas estendillada que consiste en faixar o tozuelo fendo un nyudo en un costau, y a tradicional de Sobrarbe, que consiste en envolver tot o tozuelo dende dezaga fendo un reculliu horizontal sobre a frent.

Istos mocadors son caracteristicos d'o trache clasico d'ixotero que no ye sino una simplificación d'o trache de labrador. Manimenos, o trache tradicional aragonés ye muit variau pendendo tanto d'o suyo orichen cheografico (Echo, Ansó, Ribagorza, Chistén, etc.) como d'o suyo emplego y clase social. Asinas se distinguen os traches de comunión, de fiesta, de labrador, etc. Consiguientment, i hai un gran numero de mocadors diferents que fan parti d'os diferents traches podendo estar de cualsiquier atra color, mesmo negro (propio d'hombres d'edat) u estampau.^[3]

Recientment, o cachirulo ye una prenda que s'ha popularizau como identificativa d'as fiestas d'o Pilar en portar-lo os chóvens anyudau a o cuello como elemento decorativo. Tamién lo fan servir hombres y mullers, no cal necesariament que leven o vestiu de baturro.