A cenisa^{[1][2][3][4][nota 1]} (d'o latín < *cinisĭa^[5]) u cendra^{[4][nota 2]} (d'o latín cĭnis) ye o producto d'a combustión de bel material, composato por sustancias inorganicas no combustibles, como sals minerals.

Parti queda como repui en forma de polvo depositato en o puesto a on que s'ha cremato o combustible (fusta, vasuera, etc.) y parti puet estar chitata a l'aire como parti d'o fumo.

En l'analís d'alimentos tamién se conoixe con o nombre de cenisas a o conchunto de minerals que no se creman ni se evaporan. Dimpués de calcinar-lo, ye mas fácil fer un analís detallato de cada mineral. Asinas por eixemplo, dimpués d'analizar miel obtenemos as siguients cantidaz:

• Fructosa: 38%.
• Glucosa: 31%.
• Sacarosa: 1%.
• Augua: 17%.
• Atros carbohidratos: 9.
• Cenisas: 0.17%.

En iste eixemplo, as cenisas serían o conchunto de minerals que se troban en a miel.

A cenisa de plantas (fusta, restollos, etc.) tiene un alto contenito de potasio, calcio, magnesio y atros minerals esencials ta ellas. Puet emplegar-se como fertilizant si no contiene metals pesatos u atros contaminants. Como gosa estar muit alcalina, se puet mezclar con augua y deixar-la un tiempo a l'aire ta que se niutralice en parti combinando-se con o CO2 ambiental. Tamién se'n puet mezclar con atro abono mas acido, como l'humus. A descomposición en l'humus, amás a mas fa a os minerals mas biodisponibles.

As cenisas d'animals contienen mas sodio y principalment o fosfato calcico d'os uesos. As cenisas d'incineracions humanas pueden contener restas de metals de empastes y atros implantes.