O trencauesos^[1][2] u crebantauesos^[1][2] (nombre cientificoGypaetus barbatus (L., 1758)), tamién conoixito como voleta roya^[1] por a suya caracteristica color, ye una especie d'au carnucera falconiforme d'a familia Accipitridae. Atras denominación pareixidas son crebauesos^[1] u cruixiuesos^{[1][2][nota 1]}, cascauesos^[1], devantauesos^[1] y espernaueso^[1].

Ye un vueitre notablement diferent d'atras aus carnuceras. Recibe o suyo nombre por o suyo costumbre de remontar uesos y closcaranas enta grans altarias ta soltar-los y crebar-los contra la penya ta poder-se-ne minchar o miollo.

Os animals adultos arriban a 95 u 100 cm de lonchitut total, o que as fa tornar una d'as aus volanderas mas grans d'Europa. L'amplaria d'alas gosa estar de 275–308cm, superior a la d'a resta de vueitres y d'alicas.

En o volido, son de buen distinguir por a mida en chunto con a forma d'a coda, con as plumas que i rematan en punta, que fa que l'apéndiz tienga una caracteristica forma de rombo. Os adultos, ademés, tienen as plumas d'a cabeza, o papo y a tripa de color blanquinyosa, amarellisca u narancha, que os fa de reconoixer con facilidat.

Habita preferencialment en zonas d'alta montanya, en o Viello Mundo, con poblacions en tres continents: Africa, Asia y Europa, d'entre as que as europeas son as que se troba en pior estato de conservación.

Ye una especie amenazata en amplas zonas d'a suya distribución, y en o continent europeu ye un animal en grau periglo d'extinción que ha disapareixito de bellas zonas a on que dinantes yera abundant. En l'actualidat se'n puede veyer en os Pireneus, en Cinco Villas, Picos d'Europa (reintroducito), norte d'Africa, a Val d'o Gran Rift, Sudafrica, Grecia y dende Anatolia dica os monts Tian Shan y l'Himalaya.

O trencauesos ye miembro d'un linache deseparau de a familia Accipitridae de muit antigos. En l'actualidat, as dos solas especies vivas d'ixa rama son ista y l'alica blanca (Neophron pernopterus), que no guardan mas relación evolutiva con a resta de vueitre que con os falcons y os esparvers.

En o dominio lingüistico d'a luenga aragonesa a especie recibe diferents nombres u zoonimos, toz ellos fendo referencia a l'afición d'istes animals por os uesos, pos incluyen o lema «uesos» en a forma, acompanyada de verbos sinonimos como crebar, trencar, cruixir/cluixir/cluchir u romper. A forma mas distribuida en aragonés centro-oriental ye trencauesos, documentada en Benás,^[2] Aguilar,^[2] a Mula,^[2] Chistau, Tella y Panticosa,^[2] y se reconoix como antiga en belatros como Puértolas y a Buerda. Se pronuncia con protesi velar.

Atras formas con menor extensión y tamién pronunciadas con protesi velar son: rompeuesos, documentau en Alquezra y en Biarche,^[2] en o norte d'o Semontano de Balbastro, y en as Bellostas,^[2] en o sud de Sobrarbe; cluchiuesos u cluixiuesos (con pronuncia /klutʃi'gwesos/), emplegadas en o Semontano de Balbastro (Salas Altas, Radiquero^[2][3]) y o Viello Sobrarbe,^[4] a on que se troba a pronuncia castellanizada /kluxi'gwesos/ , d'alcuerdo con Vidaller;^[2] crebantauesos y as variants levantauesos / devantauesos se fan servir en a Val d'Echo;^[2] crebauesos se documenta en Benás^[2] y cascauesos ye tamién emplegada en o Viello Sobrarbe.^[4] Finalment, a forma espernauesos (que viene, posiblement, de o verbo espernar/esperniar: cayer por un cillo, que s'emplega en Sobrarbe) se fa servir (en chunto con trencauesos) en tellán, chistabín, y tamién en a Buerda;

• 👁 Adulto.
  
  Adulto.
• 👁 Os eixemplars chovenils tienen as plumas fuscas.
  
  Os eixemplars chovenils tienen as plumas fuscas.
• 👁 Os adultos (sexualment maduros) tienen a cabeza, o papo y a tripa blanca, amariella u narancha.
  
  Os adultos (sexualment maduros) tienen a cabeza, o papo y a tripa blanca, amariella u narancha.
• 👁 Chovenil
  
  Chovenil
• 👁 Parella d'adultos.
  
  Parella d'adultos.
• 👁 En volido.
  
  En volido.
• 👁 Gypaetus barbatus aureus
  
  Gypaetus barbatus aureus
• 👁 Gypaetus barbatus hemachalanus
  
  Gypaetus barbatus hemachalanus

• 👁 Colabora en Wikispecies
  Wikispecies tiene un articlo sobre Gypaetus barbatus.
• 👁 Colabora en Commons
  Se veigan as imáchens de Commons sobre trencauesos.