Naja ye un xéneru de reptiles escamosos de la familia Elapidae.^[1] La cobra real pertenez a otru xéneru (Ophiophagus hannah). Anque hai otros xéneros que comparten el nome común, Naja ye'l grupu más reconocíu y estendíu ente la mayoría de les culiebres conocíes vulgarmente como cobres. El xéneru Naja compónse de 20 a 22 especies, pero sufrió dellos cambeos taxonómicos polo que fai que camude constantemente.

Les especies varien en llargor y la mayoría son relativamente delgaes de cuerpu. La mayoría de les especies son a algamar llargores de 1.80 metros. Los llargores máximos de delles de les especies más grandes de les cobres ye d'alredor de 3 metros de llargor, siendo la Cobra de monte (Naja melanoleuca) la que podría dicise que ye la más llarga del xéneru. Toes tienen la capacidá d'alzar la parte delantera de los sos cuerpos del suelu y apandar los sos pescuezos pa paecer más grande al respective de un depredador.

Toles especies pertenecientes al xéneru Naja son capaces de dar una mordedura fatal nun home. La mayoría de les especies tienen un fuerte venenu neurotóxicu, qu'ataca'l sistema nerviosu, causando paralís, pero munchos tienen tamién citotoxines que causen hinchadura y necrosis y tien un efeutu anticoagulante. Dalgunes tamién tienen cardiotoxines ente los componentes del so venenu.

Delles especies, conocíes como cobres cuspidores, desenvolvieron un mecanismu de tresporte de venenu nel que los sos caniles fronteros, en cuentes de soltar venenu al traviés de los caniles como una aguya hipodérmica, tienen una abertura na superficie frontera que dexa la culiebra propulsar el venenu fora de la boca. Ente que, de normal, denómase cuspir, l'aición paezse más a que llance remexos. L'algame y la precisión cola que puede disparar el so venenu varien d'especie a especie, pero utilízase principalmente como un mecanismu de defensa. Una vegada qu'entra en contautu sobre la piel d'una víctima, el venenu actúa como un irritante. Si s'introduz nel güeyu, puede causar una sensación d'ardor intenso y ceguera temporal o permanente si nun se llimpien de sópitu y a xeitu.

*) Nun s'inclúi la subespecie nominal (forma típica).
^T) Especie tipu.^[2]

• 👁 Image
  Wikimedia Commons acueye conteníu multimedia sobreNaja.