Barack Hussein Obama Jr. (4 d'agostu de 1961,Kapiolani Medical Center for Women and Children) ye un políticu d'Estaos Xuníos que foi presidente del país.

Nacíu en Honolulu (Ḥawai), Barack Obama ye fíu de padre kenianu y madre de los Estaos Xuníos. Ta llicenciáu en Ciencies Polítiques pola Universidá de Columbia y llicenciáu en Drechu magna cum laude pola Universidá de Harvard.

La carrera política d'Obama aníciase nel añu 1996 al ser escoyíu senador por Hyde Park (Chicago) al senáu estatal d'Illinois, siendo re-escoyíu los años 1998 y 2002. Nel añu 2000 intenta infructuosamente resultar escoyíu congresista a la Cámara de Representantes de los Estaos Xuníos y en 2003 decide concurrir a les eleiciones al Senáu de los Estaos Xuníos pol so Estáu.

En xunetu de 2004 Obama pronuncia un aclamáu discursu na Convención Nacional Demócrata defendiendo la herencia del New Deal de Roosevelt, cargando escontra Bush pola xestión de la Guerra d'Iraq y llamando a la unidá nacional.

L'éxitu na convención supondría-y un importante aumentu de popularidá y apurrió-y una cómoda victoria nes eleiciones escontra'l so rival a les eleiciones el republicanu Alan Keyes, tamién afroamericanu.

En febreru de 2007 Obama anuncia la so candidatura a les eleiciones presidenciales de 2008. Nes encuestes apaecía entós superáu por Hillary Clinton, pese a que nel caucus (eleiciones primaries) d'Iowa (consideráu'l principal termómetru eleutoral) Obama algamó la victoria col sofitu del 38% de los votantes, siguíu por John Edwards (30%) y Clinton (29%).

Ganó nes eleiciones presidenciales del 4 de payares de 2008, al algamar 349 'votos eleutorales' énte los 163 del so rival del Partíu Republicanu, John McCain.

Tomó posesión del cargu como 44ᵘ Presidente de los Estaos Xuníos el 20 de xineru de 2009.

Obama vien defendiendo una economía de llibre mercáu con procuru especial pa l'asistencia social a les clases más desfavorecíes. Nesti puntu aboga por la instauración d'un sistema nacional de salú con cobertura universal pa tolos ciudadanos de los Estaos Xuníos.

En materia medioambiental, Barack Obama defende que'l calecimientu global ta causáu pol home y que habría d'afitar midíes p'amenorgar les emisiones contaminantes.

Otros puntos que rescamplen nel so argumentariu políticu ye la lliberalización del albuertu, la revisión de la pena de muerte nel so país (non necesariamente la so abolición) o l'ameyoramientu de los derechos del coleutivu homosexual.

• 👁 Image
  Wikimedia Commons acueye conteníu multimedia sobreBarack Obama.
  • Páxina web oficial (n'inglés)
• Barack Obama na Internet Movie Database (n'inglés)
• Barack Obama n'AllMovie (n'inglés)
• Barack Obama en FilmAffinity (castellán)
• Barack Obama en Facebook
• Barack Obama n'Instagram
• Barack Obama en Twitter (cuenta verificada)
• Obres deBarack Obama nel Proyeutu Gutenberg
• Web oficial del senador Obama
• Web eleutoral oficial de Barack Obama (es) (en)