Denómase pexes a toos aquellos animales vertebraos que nun son miembros del grupu de los tetrápodos (los vertebraos terrestres con cuatro pates de mena quiridio). La especialidá de la zooloxía que s'ocupa específicamente de los pexes denómase Ictioloxía.

Como ye propio de los primeros vertebraos, son acuáticos y, a desemeyanza de lo qu'adicamos nos tetrápodos, la respiración produzse principalmente por branquies allugaes nes fendedures de la farinxe. La llocomoción sofítase nuna forma hidrodinámica, con movimientos llaterales del cuerpu auxiliaos por estremidades que son aletes. El grupu ye abondo heteroxéneu ya inclúi a formes tan desemeyaes como les llamprees, los tiburones o les albacores, totalizando alrodiu de 30.000 especies, siendo'l grupu más numberoso de los vertebraos.

Los pexes orixináronse a partir d'otros cordados haza l'entamu del Cambrianu. Nun se sabe a ciencia cierta au s'alluga'l so orisen; el grupu más primitivu de los pexes, los agnatos —que nun tienen calláxines— abarca a les llamprees y a los mixines, (magar que nun ta nidio si estos caberos tienen de considerase vertebraos).

Los vertebraos terrestres (tetrápodos) diferenciáronse a partir de pexes pulmonaos empareyaos col celacantu o los dipnoos, y dalgunes de les primeres formes tan a metá de camín ente'l nuesu conceutu de pexe y el d'anfibiu.

• 👁 Image
  Wikimedia Commons tien conteníu multimedia tocante a pexe.