Tenerife ye una islla, la mayor y más habitada de les siete islles Canaries, asitiaes nel norte d'África y pertenecientes al reinu d'España. Ye la de más población d'ente toles españoles: nos sos 2.034,38 km² viven 898.680 habitantes, el 43% de tolos canarios. Tenerife ye la mayor y más poblada de les islles de Macaronesia.

La islla ye ún de los más importantes destinos turísticos d'España y del mundu. Recibe cinco millones de visitantes al añu, qu'aporten a ella per barcu o por dalgún de los sos dos aeropuertos. Agospia ún de los mayores carnavales del mundu, y ye'l centru económicu del archipiélagu.

La so capital, Santa Cruz de Tenerife, ye la sede de la institución de gobiernu de la islla, el cabildu, y ye co-capital, xunto con Las Palmas de Gran Canaria, de la Comunidá Autónoma de les islles Canaries. Santa Cruz foi, de magar 1833, cuando se dividió España en provincies, hasta 1927, la capital única de l'archipiélagu, pero la Corona ordenó nesi añu que la capitalidá fora compartida. En Santa Cruz asítiase l'Auditoriu de Santa Cruz, símbolu arquiteutónicu de les islles Canaries.

Na islla alcuéntrase tamién, na ciudá de San Cristóbal de La Laguna, que fora capital del archipiélagu primeru de 1833 y que'l so cascu antiguu ye Patrimoniu de la Humanidá, la más antigua universidá canaria: la Universidá de La Laguna. Otru llugar declaráu Patrimoniu de la Humanidá ye'l Parque Nacional del Teide, asitiáu metanes la islla. El Teide ye'l monte más altu d'España, el mayor de cualesquier islla del océanu Atlánticu, y el terceru mayor del mundu por altor midíu dende la so base. Al noroeste de la islla alcuéntrase'l macizu d'Anaga, Reserva de la Biosfera dende 2015, que ye'l llar del mayor númberu d'especies endémiques nún mesmu espaciu protexíu de toa Europa.

• 👁 Image
  Wikimedia Commons acueye conteníu multimedia sobreTenerife.
• Cabildo de Tenerife Archiváu 2011-10-06 en Wayback Machine