Pol Pot (talfyriad o Politique Potentielle; Ffrangeg am "potensial gwleidyddol") (wedi ei eni fel Saloth Sar ar 19 Mai 1928-15 Ebrill 1998), oedd arweinydd y Khmer Rouge a phrif weinidog Cambodia o 1976 tan 1979. Enw swyddogol y wlad dan ei arweinyddiaeth ef oedd Kampuchea Ddemocrataidd. Am y bu farw tua thraean o boblogaeth Cambodia yn ystod ei arweinyddiaeth, mae e'n cael ei ystyried fel un o'r llofruddwyr torfol gwaethaf mewn hanes diweddar, gyda Leopold II, Adolf Hitler, Josef Stalin a Mao Zedong.

Pan oedd mewn grym, fe weithredodd bolisi gormesol o symud pobl i'r wlad yn lle'r trefi i geisio 'puro' pobl Cambodia er mwyn troi'r wlad yn un oedd yn fwy cyntefig ac amaethyddol. Roedd hwn yn cynnwys lladd rhwng un a dwy filiwn o bobl a ystyriodd ef yn 'gelynion bourgeoise'. Fe ffodd ef i goedwigoedd Cambodia ar ôl i Fietnam ymosod ar y wlad ym 1979 a chwymp y llywodraeth Khmer Rouge. Ni alwyd ef i gyfrif byth am ei droseddau, a bu farw o achosion naturiol wrth guddio.