New Yorkeko Arte Modernoaren Museoa —orobat MoMA deitua (ingelesezko Museum of Modern Art izenaren akronimoa)— arte modernoaren museo bat da, New Yorkeko Manhattan auzoan dagoena; Ameriketako Estatu Batuetako eta mundu osoko arte modernoaren museorik onenetarikoa.

1929. urteko azaroaren 7an ireki zuten Museoa publikoarentzat. Sortzaileak hauek izan ziren: Lillie P. Bliss, Mary Quinn Sullivan eta Abby Aldrich Rockefeller filantropoak. Hasieran entitate pribatua izan zen, eta partaideek eta enpresek ematen zutenekin jardun zuen Museoak; berrikuntza izan zen antzerako museoetan onartzen ez ziren arte gaiak onartzen zituelako: gerora besteek adibidetzat hartu zuten. 2004. urtean berritu egin zuten.

Adituek diotenez, maisulanen munduko bilduma garrantzitsuenetarikoa dago MoMAn. Besteak beste, Van Gogh, Piet Mondrian, Pablo Picasso, Salvador Dalí, Jackson Pollock, Andy Warhol eta Edward Hopper gisako egileen obrak daude Museoan.

Pinturaz gain, diseinu grafikoa, diseinu industriala, argazkiak, arkitektura, zinema eta inpresio eremuetako lanak jasotzen eta erakusten dituzte.

• Webgune ofiziala