No sistema político-administrativo español, un tenente de alcalde ou vicealcalde (vicealcaldesa, tenenta de alcalde, tenenta de alcaldesa ou tenente de alcaldesa, nas súas formas femininas) é un concelleiro ou concelleira dun concello nomeado polo alcalde ou alcaldesa.^[1] É membro da xunta de goberno con voz e voto. Amais, ten a capacidade legal para substituír ao alcalde nos supostos que determina a lexislación, principalmente en caso de enfermidade, ausencia, dimisión ou falecemento,^[2] nestes dous últimos casos ata que o pleno elixa un novo alcalde.

Esta persoa asiste ao alcalde e participa en tódalas decisións importantes do concello,^[3] ocupando o segundo posto na orde de prelación despois do alcalde.^[4]

Os nomeamentos faranse por resolución do alcalde, da que se informará ao pleno na súa primeira sesión. Os nomeamentos tamén son notificados persoalmente e a resolución publícase no boletín oficial da provincia (BOP). O nomeamento produce efectos ao día seguinte da sinatura da resolución por parte do alcalde. É necesaria aceptación por parte do nomeado ou nomeada.

Nos concellos con xunta de goberno local, o número de tenentes de alcalde non pode superar o número de membros da xunta. Onde non haxa xunta, o número de tenentes de alcalde non poderá exceder dun terzo do número legal de membros da corporación municipal.

A condición de tenente de alcalde pérdese por dimisión, destitución por decreto do alcalde ou perda da pertenza á xunta de goberno local.