Istanbul (tierkesch İstanbul), dat aalt Konstantinopel, ass mat 15.655.924 Awunner (Stand 2023)^[1][2] déi gréisst Stad an der Tierkei a gouf ënner dem Numm Byzantion gegrënnt.

D'Stad läit souwuel op der europäescher wéi och op der asiatescher Säit un den Uwänner vum Bosporus an ass dofir déi eenzeg Metropol, déi sech iwwer zwéi Kontinenter erstreckt. Mat hirer bal dräidausendjäreger Geschicht ass s'eng vun den eelste Stied, déi haut nach op der Welt bestinn. Istanbul ass de Kultur- a Wirtschaftszentrum vun der Tierkei. Traditiounsgeméiss ass Istanbul de Sëtz vum Patriarch vu Konstantinopel, deen als Chef vun der ganzer Orthodoxie unerkannt ass. D'Stad ass de Sëtz vum Äerzbëschof vun der tierkesch-orthodoxer Reliounsgemeinschaft, vum armeeneschen Äerzbëschof a vum tierkeschen Ieweschte Rabbiner.

D'Stad Istanbul ass an 39 Staddeeler agedeelt: 25 op europäeschem, a 14 op asiateschem Buedem.

Istanbul ass eng Universitéitsstad an huet a senge Mauere Bibliothéiken, eng Rei vu Muséeën an och auslännesch Kulturinstituten. D'Alstad vun Istanbul gouf 1985 op d'UNESCO-Lëscht vun de Weltkulturierwe gesat.

Istanbul war 2010, mat Essen a Pécs, Europäesch Kulturhaaptstad.

1. ↑ Dës Informatioun gëtt automatesch vu Wikidata agebonnen.
2. ↑ https://data.tuik.gov.tr/Bulten/Index?p=Adrese-Dayali-Nufus-Kayit-Sistemi-Sonuclari-2023-49684.