Ang Santa Lucia (Ingles: Saint Lucia NK /səntluːˈsiːə,_ʔˈluːʃə/, EU /seɪntˈluːʃə/; Pranses: Sainte-Lucie) ay isang pulong bansa sa Kanlurang Indiyas sa silangang Dagat Karibe sa hangganang ng Karagatang Atlantiko.^[1] Tinatawag ang pulo dati bilang Iyonola, ang pangalang binigay sa pulo ng mga katutubong Arawak, at sa kalaunan Hewanorra, ang pangalang binigay ng katutubong Kalinago, dalawang magkahiwalay na mga Amerindyo. Bahagi ng Kapuluang Windward ng Mas Mababang Antillas, matatagpuan ito sa hilaga/hilaga-silangang ng pulo ng San Vicente, hilagang-kanluran ng Barbados at timog ng Martinika. Nasasakop nito ang isang lupain na may sukat na 617km² (238 milya kuwadrado) at naiulat ang isang populasyon na 165,595 noong senso ng 2010.^[2] Castries ang kabisera nito at pinakamalaking lungsod, at ikalawang pinakamalaki ang Soufrière, ang unang kolonyal na kabiserang Pranses sa pulo.

Ang mga Pranses ang unang mga Europeo na nanirahan sa pulo. Pumirma sila ng kasunduan sa mga katutubong Pulong Karibe noong 1660. Kinontrol ng Inglatera ang pulo mula 1663 hanggang 1667. Noong sumunod na mga taon, nakipagdigma ito sa Pransya ng labing-apat na beses, at madalas na papalit-palit ang pamumuno sa pulo. Noong 1814, tiyak na nakontrol ng mga Britaniko ang pulo. Dahil malimit ang palipat-lipat sa pagitan ng mga Briton at Pranses ang pulo, nakilala ang Santa Lucia bilang ang "Helen ng Kanluran" na hango sa pang-mitolohiyang karakter ng mga Griyego na si Helen ng Troy.

Nagkaroon ng pamahalaang kinakatawan noong mga 1840. Naitatag ang pangkalahatang pagboto noong 1953. Mula 1958 hanggang 1962, naging kasapi ang pulo sa Pederasyong Kanlurang Indiyas. Noong Pebrero 22, 1979, naging malayang estado ang Santa Lucia at naging kasapi ng Komonwelt ng mga Bansa bilang lupaing Komonwelt.^[1] Magkahalong hurisdiksyon ang Santa Lucia,^[3] ibig sabihin, may sistemang legal ito na nakabatay sa parehong batas sibil at karaniwang batas na Ingles. Nakabatay ang Kodigo Sibil ng Santa Lucia ng 1867 sa Kodigo Sibil ng Quebec ng 1866, na pinupunan ng istilong Ingles na karaniwang batas na lehislatura. Kasapi din ang bansa sa Organisation internationale de la Francophonie.^[4]