Tallinn, wo früener der dütsch Name Reval gha het, isch d Houptstadt vo Eschtland.

Reval isch sid em 11. Joorhundert en chlyne Hafe a der Oschtsee gsi. Ane 1219 hend d Dääne d Burg vo de Eschte bi Reval eroberet, und ane 1227 het der dütsch Ridderorde vo de Schwärtbrüeder s Piet übernoo. D Ridder hend ane 1230 d Stadt bim Hafeplatz gründet, sind aber ane 1237 em Dütsche Orde byträtte, und derno isch Reval wider an Dänemark ggange. 1346 het der Dütsch Orde d Stadt übercho. Vo 1561 bis 1710 hend d Schwede im Piet vo Reval regiert, sid 1710 d Russe. Vo 1918 bis 1940 isch Reval d Houptstadt vo der erschte unabhängige Republik vo Eschtland gsi, vo 1944 bis 1990 vo der Sowjetrepublik i däm Piet, und sid 1991 isch Eschtland wider unabhängig, mit Tallinn als sinere Houptstadt.

S alte Zäntrum vo Tallinn isch sid 1997 uf der Lischte vom Wältkulturerb vo de UNESCO.