A Republica de Gambia ye un estato d'Africa occidental. Ye rodiata por Senegal menos en a desembocadura d'o río Gambia en l'Oceano Atlantico. A suya capital ye Banjul.^[1]

A suya población ye de 1.593.256 habitants (2005), en una superficie de 11.295 km², con una densidat de población de 132 hab./km².

Gambia ye un país chiquet y estreito (tien menos de 48km d'amplaria) con a buega basada en o río Gambia. Ista buega se definió en 1889 seguntes un alcuerdo entre Reino Uniu y Francia. Ye cuasi un enclau en Senegal, y ye o país mas chicot de l'Africa continental.

Antiga colonia britanica, se declaró independient o 18 de febrero de 1965 como monarquía adintro d'a Mancomunidat de Nacions. Se convirtió en una republica en 1970 y, entre 1982 y 1989, formó una confederación con Senegal, que clamoron Senegambia.

Gambia se troba en a costa occidental d'o continent africano y ye lo suyo país mas chicot con una superficie de 11.295km². A buega, que tien arredol de 740 kilometros de luengo, sigue o curso d'o río Gambia per una longaria de 480 kilometros y una amplaria de diez a 50 kilometros. Antiparte d'a costa, Gambia ye rodiada per Senegal, que ye vinte vegadas mas gran. A ormino se fa referencia a lo país como un enclau, pero isto no tien en conta l'acceso a l'Oceano Atlantico. Lo curso inusual d'a buega de Gambia s'explica per l'historia cheneralizada que os barcos britanicos disparoron dende a parti navegable d'o río con canyons a toz costaus pa definir una linea fronteriza contra os franceses con l'alcanz d' istos canyons.^[2] Gambia ye un país plano, que la suya altaria ye entre 0 my 53 m sobre o livel d'a mar.

Lo clima ye tropical con una estación pleviosa y una estación ixuta pronunciadas. A estación ixuta dura dende noviembre dica mayo. Ye influenciau per l'aire ixuto d'o nord-este d'o Sahara, clamau Harmattan. As temperaturas meyas s'elevan a valors entre 21 y 27 graus centigraus, aconseguindo valors maximas superiors a los 40°C. A humedat relativa remaneix en o rango entre o 30 y o 60 per ciento.

Gambia manca de chacimientos minerals d'importancia ni atros recursos naturals. A suya economía se basa en os productos agricolas y a ganadería pa lo consumo interno d'o que depende o 75% d'a población.

A industria se centra en a transformación de productos agricolas (cascagüet) y de peix. Lo turismo estió una important fuent d'ingresos dica 2000, cuan se produció una reducción. A suya actividat depende fundamentalment d'as aduyas a lo desarrollo d'o Fundo Monetario Internacional y d'emerchencia d'os países desarrollaus. As futuras expectativas d'o Banco Mundial, dimpués a condonación parcial d'a deuda externa en 2005, son positivas.

Articlo principal Demografía de Gambia.

Gambia ye un país son muita densidat de población (132 hab./km² en 2005) y con alta tasa de creiximiento d'a suya población.

O 63% d'a población total d'o país vive en o medio rural, y nomás o 37% vive en o medio urbán.

A gastronomía gambiana incluye entre os ingredients mas comuns o peix, o roz, o maní, o tomate, o fresol puntiau, o limón, a mandioca, a col, o bruno, o chili y cuantas hierbas. As ostras son una birolla muit popular y son tradicionalment replegadas en o río Gambia. Beluns platos tipicos son: Benachin, Domoda, Yassa, Maafe y Thiakry.

• 👁 Colabora en Commons
  Se veigan as imáchens de Commons sobre Gambia.
• Pachina web oficial d'o Gubierno de Gambia.