L’Alemagne, tot-pariér les Alemagnes, (en alemand Deutschland, en bâs-alemand Düütschland, en hôt-sorabo Němska, en danouès Tyskland, en sinto rromani Gáčkano, en bâs-sorabo Nimska, en frison septentrionâl Tjüschlönj, en frison orientâl Düütsklound) est yon de los payis endustrialisâs principâls du mondo. Situâ dens l’Eropa centrâla, el est encâdrâ u nord per la mar du Nord, lo Danemârc et la mar Baltica, u levant per la Pologne et la Tch·èquie, u sud per l’Ôtrich·e et la Suisse, et u ponant per la France, lo Luxembôrg, la Bèlg·ique et los Payis-Bâs. La capitâla est la vela de Bèrlin.

L’Alemagne est una rèpublica fèdèrâla, composâ per 16 Ètats apelâs Bundesländer, qui dens cèrtênes sféres ag·éssont endèpendament de la fèdèracion. El est organisâ selon lo principo de sèparacion des povêrs et d’una dèmocracia reprèsentativa a règ·imo parlementèro. Historicament sè composent de plusiors nacions sôverenes avouéc lor prôpra histouère, cultura et religion, l’Alemagne at étâ unifiâ coment Ètat-nacion pendent la guèrra franco-alemanda de 1870 / 1871.

La Rèpublica fèdèrâla d’Alemagne est un Ètat membro du Consèly de l’Eropa (1951), de l’OCDE, de l’Union de l’Eropa occidentâla (1954), de l’OTAN (1955), de l’Union eropèèna (1958), dont el est un membro fondator, de l’ONU (1973), de l’OSCE, du G8 (1975), des nacions G4 et de la zona erô. El est l’Ètat membro lo més populox et lo més èconomicament pouessient de l’Union eropèèna. L’Alemagne jouye asse-ben un rolo en tant qu’una des pouessiences principâles du mondo.

L’Alemagne est composâ de 16 Ètats (Bundesländer):

• la Baviére
• la Hesse
• ...