$ je Kopp

Dat Emirat Katar (araabsch: قطرQatar, DMGQaṭar) is en Staat in'n Noordosten vun de Araabsche Halfinsel an den Golf vun Persien. Katar liggt up en smalle, ovale Halfinsel un grenzt in't Süden an Saudi-Arabien. Vun Süden na Norden to is dat Land bi 180 km lang un vun Westen na Osten to sund dat bi 80 km. To den Staat höört ok en Reeg vun Eilannen. Dat Land is an' 3. September 1971 unafhängig wurrn.

In Katar leevt 1.699.435 Lüde (2010). Um un bi 80% vun de Inwahners sund Utlänners. 34% kaamt ut Indien un Pakistan, 16% ut den Iran un 5% noch annerwegens her. Bi 25% vun de Inwahners stammt ut annere araabsche Länner. Twuschen 1994 un 2004 is de Inwahnerstahl jedet Johr um 4,2% stegen. In dat Johr 2004 sund bi 22,3% vun jem unner 15 Johre oold ween. In datsülvige Johr hefft 92% vun de Inwahners in Städer leevt. In'n Döörsnitt konnen se dor mit reken, 74 Johre oold to weern. 77% vun de Lüde in Katar höört to de Sunniten ehrn Twieg vund en Islam to, tomeist sund se sunnerlich strenge Wahabiten. De sunnitische Twieg vun den Islam is ok Staatsreligion in dat Land. Mank de Utlänners gifft dat sunnerlich Schiiten, man ok en bannigen Deel an Hindus un denn ok bi 70.000 Christenlüde.^[1] Amtsspraak is Araabsch, Spraken for den Hannel sund Persisch un Engelsch, dormank weret ok Urdu un anner indoarische Spraken snackt.

1. ↑ Radio Vatikan: Katar: Neue Kirche in der Wüste 30. März 2007