Nadal (var. Nadau)^{[nòta 1]} es una festivitat crestiana que correspond al 25 de decembre –tanben conegut coma la Nativitat de Jèsus de Nazaret–, e lo cicle de temps entre l'avent e l'epifania.

Amb lo jorn de Pasquas, es la fèsta mai importanta. Aquesta celebracion a pres talament de vam dins lo mond entièr qu'es celebrada tanben dins de païses qu'an pas coma religion dominanta una religion crestiana.

En tèrras occitanas e mai que mai en Provença, es costumièr de bastir una grépia amb de santons que representan, a mai de la naissença del nenon Jèsus, d'unes personatges o mestièrs tradicionals. En Provença encara, se sòl preparar los tretze dessèrts (simbolizan los dotze discipols de Jèsus e lo Crist).

Una autra tradicion nadalenca plan espandida es la del cachafuòc o soc de Nadal, compartida amb los Païses Catalans, que consistís a recitar una poesia pichoneta per aver los presents de Nadal que nos pòrta una soca.

Evidentament dins lo país occitan coma de pertot se cantan de cançons per aquesta fèsta. Se sonan nadals e los mai coneguts son los qu'escriguèt lo provençal Sabòli.