Albentosa ye un municipio aragonés de la provincia de Teruel, situau en la comarca de Gúdar-Chabalambre y partiu chudicial de Teruel.

La suya población ye de 290 habitants en una superficie de 68 km², con una densidat de población de 4,26 hab/km².

Lo toponimo Albentosa se puede interpretar a partir de l'antroponimo arabe Tusar como Abin Tusar.^[1]

Bi ha un casal dito "Fuent d'el Cepo", con apocope tipico de l'aragonés. Atros toponimos con components en aragonés u en común con l'aragonés son Andreu, La Canaleta, La Barbereta, Bolage, Camino las Clochas, Clote Grande, Clotes de las Estacas, La Clapiza los Mases, La Covata, La Codonyera, Coronillas, Loma Royal, Mas d'el Royo, El Navajo, Los Planos, Tariuela y El Hurcato.

La localidat d'Albentosa ye situada a 952 metros d'altaria sobre lo livel d'a mar, a l'este de la sierra de Chabalambre y a lo norte de la sierra d'el Toro, chunto a lo río d'Albentosa, tributario de Millars. Ye a una distancia de 46 km de Teruel, la capital de lo suyo partiu chudicial y de la suya provincia.

En lo termin municipal d'Albentosa se troban los nuclios de población de Venta del Aire, Estación de Mora de Rubielos, Fuent d'el Cepo, Los Mases (Mases del Río y Pozolance). Una important duana de lo Reino d'Aragón correspondeba a un despoblau conoixiu como Las Barracas de los Chaqueses, actualment un mas deshabitau con tres edificios conoixiu como Venta de la Jaquesa u simplament La Jaquesa. Se tiene conoixencia d'atros nuclios de población menors habitaus u no como Venta del Barro, Atalaya, El Chopo, Estación de Rubielos de Mora, Hoya de Sancho, Los Bartolos, Los Pepitos y El Cagarrete.^[2]

Seguntes Agustín Ubieto Arteta, la primera cita de lo lugar ye de 1194, recollida en la tesi doctoral d'Ana Bonet Punsoda La Orden del Temple y su encomienda de Zaragoza (Facultat de Filosofía y Letras, Universidat de Zaragoza, curso 1966-1967), y documenta nomás lo nombre d'Albentosa.^[3]

Perteneixió a los Templers. En 1251 Eximén Pérez d'Arenós cambió Masarroyos y Benifaraich por Albentosa y mugó lo suyo termin:^[4]

En 1272 lo chuez Albert de Lavánia adchudicó Albentosa a lo concello de Teruel, feito confirmau por Chaime I l'1 de mayo.

Adintro de la comunidat d'aldeyas de Teruel, Albentosa feba part de la seixma d'el Campo de Sarrión. En 1446 feguraba en la sobrecullida de Teruel, manimenos en 1495 yera en la sobrecullida de Mont Albán. En 1646 yera una localidat de la vereda de Teruel. Entre 1711 y 1833 yera en lo correchimiento de Teruel. En 1785 teneba la categoría de lugar, tenendo concello en 1834. Yera en lo partiu chudicial de Mora de Rubielos pero en 1965 pasó depender de lo partiu chudicial de Teruel.^[2]

En 1810 estió escenario de la Guerra de lo Francés, cuan lo cheneral Józef Chlopicki capturó una columna d'artillería comandada por José María de Carvajal que fuyiba de Teruel, conquiesto por los bonapartistas.

Albentosa estió un escenario de la Guerra Civil Espanyola en 1938 poco dimpués d'haber encomenzau la ofensiva de Levant dende Teruel enta Murviedro y Valencia (25 de marzo - 24 de chuliol), y tamién dimpués de la fin d'esta ofensiva por contraataques republicanos.

• En Albentosa bi habió un castiello templero de lo sieglo XII.^[6]
• Ilesia de Nuestra Sinyora de los Ánchels, de lo sieglo XVI, d'estilo gotico tardano-renaixentista.
• Casa de la Villa, de lo sieglo XVIII.
• Puent medieval, de los sieglos XV-XVI.
• Ermita d'a Fuent d'o Cepo.

2 y 3 d'agosto: Sant Roque.

• www.albentosa.com, pachina web no oficial.