Aturri ibaiak udalerria iparraldetik mugatzen du. Aturrik berak uharte bat sortzen du udalerri honetan, gaur egun Lehuntzeko uhartea deitzen dena; uhartea sortzen duen Aturriren adarrak l'Aiguèta^[3] du izen. Kondistegi errekak, Ardanabia ibaiaren ibaiadar batek, udalerriaren hegoaldea zeharkatzen du^[4].

Udalerrian altuerak oso apalak dira: Aturriren ibarra itsasoaren mailan dago eta punturik altuena 97 metroko muinotxo bat da, Mugerrerekiko mugatik hurbil. Herri-barnea 70 bat metrotan dago.

Aturriren hegoaldeko auzokide lapurtarrak:

• Urketa ekialde eta hego-ekialdean.
• Mugerre mendebalde eta hego-mendebaldean.

Aturriz bestaldera, mendebaldetik ekialdera:

• Baiona.
• Tarnose eta Sent Martin de Senhans udalerri okzitaniarrak; Senhans eskualdekoak, administratiboki Landetan daude.

• Eliza
• Tarre Behere
• Tarre Garai

Lehuntze zenbait herri-elkargoren kidea da, haien artean:

• Errobi-Aturri Herri Elkargoa.
• Baiona-Donostia Euskal Eurohiria.

2008an alkatetza eskuratu zuen Gillemotonia Réussir Lahonce-Lehuntze hobetu izaneko zerrendaren burua izan zen; ordura arteko François Bioy auzapezarenari irabazi zion^[7].

Udalerria departamendu mailako errepide hauek zeharkatzen dute:

• D 312: Aturriren ertzetik Lehuntzeko mendebaldeko bazterretara lehen eta hegoaldeko muga, Kondistegi errekaren parean gero pasatzen ditu Beskoitzerako bidean.
• D 261: Aturriren bidea segitzen du. Mugerreko Portua auzotik Ahurtirako bidean, beraz, iparraldeko auzoak zeharkatzen ditu.
• D 257: Hiru Elizateak (Milafranga, Mugerre, Hiriburu) mugarritik iparralderantz jota, D 312 gurutzatu, herri-barnera heldu eta hor ekialderantz abiatzen da, Urketarantz.
• D 161: herri-barnetik iparralderantz D 261ekin lotura egiteko, elizatik pasatuta.

Gaur egun desagertu diren bi garraio-motak azpimarra daitezke:

• Aturrin ontzi mota desberdin batzuen (batez ere galuparen) bidezkoa. Orain Port de l'Aiguèta izeneko portutxo bat geratzen da, aisialdiarekin eta eskala txikiko arrantzarekin lotuta.
• Tolosa-Baiona trenbideak eman zion kolpe handia ibaiaren bidezko garraioari. Herriak geltokia izan zuen baina hori ere desagertu zen, autoen erabileraren garapenarekin.
• Gaur egun, beraz, garraiobide publiko bakarra autobusa da.

Herrian Ama Eskola eta Lehen Hezkuntzako eskola publikoa dago; 2009-2010 ikasturtean 195 ikasle zituen eta adar elebiduna ere badu^[8].

Lehuntzen elkarte ugari dago^[9]; denak Entente lahonçais delakoan biltzen dira. Haietako batzuk:

• Eskulari (esku pilota) eta Lehunztarrak (pala).
• "Atxik eta segi"^[10] eta ACPG-CATCM zaharren elkarteak.
• Football Club Lahonce-Urcuit-Briscous futbol taldea. Zelaia Lehuntzen dago.
• Hik hasi: euskara eskolak eta kantua.
• Lehuntze kantari.
• Ttirrittak: dantzak (mutxikoak...).

Igandero antolatzen den merkatua ere azpimarratzekoa da^[11].