Lisa Rae Harriton, nada en Londres o 18 de novembro de 1980, é unha música inglesa. Dende 2007 toca os teclados e faille os coros á banda de rock alternativo The Smashing Pumpkins. Harriton tamén é vocalista e compositora facendo unha mestura entre soul e pop influenciado polo jazz e a world music. Harriton comezou a súa carreira como vocalista de estudio con 8 anos de idade, facendo traballos para Disney, Integrity Media e Word Records.

A súa nai, Terry Harriton, é unha vocalista de estudio nos Ánxeles, o seu pai, Michael Harriton, é compositor e músico, e o seu irmán máis vello Steven tamén é músico. Harriton asistiu e completou estudos de piano clásico na Royal Schools of Music de Londres, e completou ademais estudos de piano de jazz na University of Southern California en maio do 2004.

Actuou en clubs de jazz na China, o Xapón, o Perú e os Estados Unidos e traballou con músicos como Ingrid Jensen e Ernie Watts. Apareceu nos American Music Awards do 2009 con Adam Lambert tocando os teclados, e tamén apareceu con Adam nos programas CBS Early Show, Late Night with David Letterman e The View.