Ny Diptera dia filaharana iray ao amin' ny kilasin' ny bibikely. Iray amin' ny filaharana lehibe indrindra izy io raha jerena ny isan' ny karazana. Ity vondrona ity dia ahitana karazana voatondro amin' ny anarana hoe lalitra, moka sns. Elatra roa ihany no ananan' ny bibikely ao amin' io filaharana io mba hanidinany. Filaharana lehibe misy karazana 1000000 any ho any ny Diptera, anisan' izany ny lalitra, ny lali-tsoavaly, ny moka ary ny hafa, na dia eo amin' ny 125000 eo ho eo aza no voafaritra mazava.
Manana loha afaka mihetsiketsika, misy maso mitambatambatra lehibe roa ny Diptera, ary ny vavany natao hanindrona sy hitsentsitra (moka, lalitra mainty, sns), na hilelaka sy hitroka, ao amin' ny vondrona hafa. Mahatonga azy ireo ho afaka miodinkodina sy mivily lalana mora foana rehefa manidina ny firafitry ny elany, ary ahafahany mifikitra amin' ny faritra malama ny tongony. Mandalo fiovana endrika tanteraka ny lalitra; matetika ny atodiny no apetrany eo amin' ny loharanon-tsakafo ary ny olitra, izay tsy manana rantsam-batana tena izy, dia mivoatra ao amin' ny tontolo voaaro, matetika ao anatin' ny loharanon-tsakafony. Tsy mamoaka atody ety ivelany ny karazana hafa fa tonga dia olitra no mivoaka eo amin' ny fatim-biby, amiin' ny tay, amin' ny akora an-dalam-pahasimbana, na ratra misokatra amin' ny biby mampinono. Ny monany dia fonosana henjana izay mamoaka bibikely tonga amin' ny fahalehibeazany rehefa vonona ny hanao izany; fohy ny androm-piainan' ireo bibikely ireo rehefa lehibe.
Iray amin' ny laharam-bibikely lehibe ary manana lanjany eo amin' ny tontolo iainana sy eo amin' ny olombelona ny Diptera. Mpamindra vovobony manana ny maha izy azy ireo bibikely ireo, faharoa aorian' ny tantely sy ny Hymenoptera hafa. Mety ho anisan' ireo mpamindra vovobony voalohany indrindra teo amin' ny fivoaraena miandalana ny Diptera. Ampiasaina ho zavamananaina filamatra amin' ny fikarohana ny Diptera mpihinana voankazo (Drosophila), saingy tsy dia tsara loatra, ny moka dia mpamindra tazomoka, aretina dengy, tazon' i Nily Andrefana, tazovony, aretina an-doha, ary areti-mifindra hafa; ary ny lalitra an-trano, izay mifanerasera amin' ny olombelona, dia mampiely aretina azo avy amin' ny sakafo. Mety hanelingelina ny Diptera, indrindra any amin' ny faritra sasany eto amin' izao tontolo izao izay misy azy betsaka, mitabataba sady mipetaka amin' ny hoditra na maso mba hanaikitra na hitady ranon-javatra. Mamely ny biby fiompy toy ny omby ny Diptera lehibe kokoa toy ny lalitra tsetse sy ny Cochliomyia ka miteraka fahavoazana ara-toekarena lehibe. Ampiasaina amin' ny fanjonoana ny olitry ny lalitry ny hena sy ny olitry ny Diptera hafa, ho sakafom-biby mpihinan-kena, ary amin' ny fitsaboana hanesorana ny sela maty mba hanadiovana ny ratra.