Cebu City, Talisay City naghigpit na sa seguridad

CEBU, Philippines — Gi-implementar na sa Cebu City Police Office(CCPO) ang ilahang security measures subay na sa Semana Santa 2026 matud pa ni Police Lieutenant Colonel Franc Rudolf Oriol, tigpamaba sa CCPO.

Marso 28 pa lang nagsugod na sila og deploy og mga polis sa mga simbahan, chapels, religious sites ug ubang dapit nga adtuan og daghang tawo. Apil sab sa gihatagan og pagtagad ang mga terminals ug pantalan pinaagi sa pakig-alayon sa Philippine Coast Guard, Philippine Ports Authorities ug ubang ahensiya sa gobiyerno.

Moabot sa 700 ka mga police personnel ang gipakatap sa Cebu City Police Stations ug giabagan sila sa mga personnel sa Local Government Unit, ubang government agencies ug force multipliers.

Sa pikas bahin,  gipahimangnoan una ang mga motorista sa City of Talisay-Traffic Operation Development Authority (CT-TODA) nga kung mahimo likayan ang pag-agi dapit sa mga simbahan para sa mga tawong namalandong karong Semana Santa.

Ang CT-TODA nagpahibawo nga lima ka dagkong simbahan sa Talisay ang adunay mga kalihukan nga prosesyon sugod karong adlawa, Miyerkules Santo.

Ang mga simbahan nga gihisgutan mao ang Sta. Teresa de Avila Parish sa Barangay Poblacion, St. Joseph the Worker sa Barangay Tabunok, Sto. Niño Parish sa Barangay Mohon, San Isidro Labrador Parish sa Barangay San Isidro ug Our Lady of Consolacion sa Barangay San Roque.

Gilauman nga ang mga simbahan ang dagsaon sa katawhan karong Semana Santa busa gipaabot nga duna gyuy bug-at nga traffic ug kinahanglan ang taas nga pasensya sa mga motorista. Gipahimangnoan sab sila nga hinay-hinay sa pagpamaneho aron luwas ang pagbiyahe. Dunay mga police assistance desks  ipahimutang sa mga simbahan sukad pa niadtong Sabado. Matag karon ug unya adunay mga checkpoints nga ipahigayon sa mga dapit, subay sa pagpahinumdum sa mga balay patigayon sa pagpalig-on sa ilang mga seguridad ning nasinati usab nga long weekend.

Gibantayan usab sa kapulisan ang mga kabaybayon nga posibleng dagsaan unya sa mga magtutuo atol sa “gisong” karong adlaw nga Domingo.