Pinusilay ug bugas

Napatay sa mga polis si Jay Castañares, ang suspetsado sa pagpusil patay sa usa ka mamaligyaay og gulaman, human kini misukol ug nakigpinusilay sa mga polis.

Gipatay ni Castañares ang manindahay og gulaman kay iyang gitoohan nga tigpaniid sa mga polis. Si Castañares usa ka kanhi konsehal sa barangay ug nakonbikto na usab sa kasong pagpatay. Sa pagsuway pagdakop sa mga polis kang Jay nakita nga wala gyod kini laraw nga magpadakop nga buhi tungod kay nakigpinusilay kini sa mga polis ug sa dihang nasamdan iyang gidauban ang iyang balay diin siya nagtago ug nskigpinosilay. Paglurang sa boto-boto ug pagkapalong sa kayo maoy mibantang sa mga polis ang patay nga lawas ni Jay nga may samad pinosilan ug sunog na ang katunga sa iyang lawas. Nag inusara lang si Jay nga gitabangan sa daghang mga polis nga mipaarak sa ilang mga armas. Pagkadaghang bala sa armas sa mga polis ang nasayang. Tagpila kaha ang kantidad sa usa ka bala sa armas sa mga polis?

Sigun sa sulti sa akong amigo nga duwende nga kaliwat ra usab ni Jay nga isog gyod ang ilang mga kaliwat gikan sa Carcar. Ang nakapaisog ni Jay mao ang iyang kasinatian nga sa nag-edad pa kini og unom ka tuig gipusil patay mismo sa iyang atubangan ang iyang amahan hinungdan nga nanganti ang bata nga si Jay nga iya pod nga patyon ang nagpatay sa iyang amahan. Ug iya gyod kining gituman. Iyang gipatay ang nagpatay sa iyang amahan hinungdan nga nasulod siya sa prisohan.

* * *

Gipanghambog ni Presidente Bongbong Marcos Jr. nga aduna ray igong supply sa pagkaon sama sa bugas. Apan nganong mahal man ang bugas? Ayaw ko ingna nga ang taas karon nga prisyo sa bugas nakalapas sa law of supply and demand? Sa law of supply and demand kun daghan ang supply barato ang presyo pero kun gamay ang supply taas ang prisyo. Lantaran ang pamakak sa Presidente sa supply sa pagkaon nga iya pa ganing giingon nga normal ra ang presyo sa palaliton. Kaniya nga adunay minaleta nga salapi kun ang mga kanhi marines ang atong tuohan normal ra ang presyo bisan moabot pa og tag gatos ang kilo sa bugas. Dili ba abnormal?