Higalaon ang kaaway

Namahayag ang embahada sa China nga nagpabilin’g bukas ang ilang pultahan sa panagsabot alang sa usa ka “joint oil and gas development” diha sa South China Sea apan mipasidaan usab nga kinahanglan ang Pilipinas mopakita unâ og sinseridad.   Masabtan nato ang kakulang sa pagsalig sa China tungod sa maritime dispute sa West Philippine Sea.  Sa nahitabo karon, maingon nato nga aduna diay mga kaaway nga ato ra diay’ng higala.  Kon madayon kini’ng panagsabot, nahaum kini sa panultihon nga, “Sama ra nga nabuntog nako ang akong kaaway kon mahimo nako siya’ng higala.” Muleeng!

Mas laksot ang solusyon

Matud pa sa Philippine National Police (PNP) aduna na’y 415 ka mga gas station sa nasud ang ilang gipasirad-an tungod sa paglapas niini sa kamanduan nga nagdili sa hoarding, overpricing ug uban pa’ng dili makiangayon nga pamaagi sa patigayon taliwala sa krisis sa lana tungod sa gubat sa Middle East.  Dili kaha mas maayo nga multahan na lang inay pasirad-an aron padayon gihapon kini nga maka-suplay sa gasolina ngadto sa katawhan?  Morag haum na sad ni’ng kahimtanga ang panultihon nga, “Ang sulbad sa gobyerno sa problema, mas laksot pa hinoon kay sa problema nga buot sulbaron.”  Fezteleern!

Wa na’y ibaligya

Mipasalig ang Metropolitan Cebu Water District (MCWD) nga adunay igong suplay sa tubig sa Sugbo bisan pa man sa hulga sa El Niño.  Dugang pa sa manager sa MCWD, ang kasamtangan’g volume sa tubig karon sobra kaayo kon itandi sa panginahanglan.  Bisan pa man ni’ng maong pasalig, angayan hinumduman nga ang kadaghanon sa tubig wala magpasabot nga parehas ang gikusgon sa agas niini sa matag lugar.  Matud pa bitaw sa pilosopo nako’ng silingan, “Dili gyud angay hutdon sa konsumidor ang tubig sa MCWD, kay unsa pa ma’y ibaligya nila?”  Madahaan!

Gamay ra’g gasto

Gisikop sa kapolisan ang usa ka tawo nga nangawat og diesel fuel sa gi-parking  nga truck nga gipanag-iya sa Lucky Hardware and Fishing Supply didto sa Barangay 37, Tacloban City. Giawhag tinuod sa gobyerno ang katawhan nga modiskarte taliwala sa krisis sa gasolina apan wala itugot ang pagpangawat.  Makapahinumdum sa bana kansang asawa gikawatan sa iyang credit card apan wala mopakita’g kahingawa ug wala gani moreport sa kapolisan, Ang iyang rason mao nga, “Mas maayo nga adto na lang to sa kawatan ang credit card kay mas gamay ra man ang ginastohan sa kawatan kay sa akong asawa.”  Atala lagee!

Nalangan nga ayuda

Libo-an ka mga driver dinhi sa Cebu ang nagpaabot pa hangtud karon sa gisaad nga fuel subsidy gikan sa kagamhanan.  Suliran pa hangtud karon kon unsaon pagpanghatag tungod kay migamit man ang gobyerno sa e-wallet sama sa Gcash alang sa pag-apod-apod sa ayuda. Adunay mga edaran na nga driver nga dili maantigo mogamit og e-wallet busa angayan nga pangitaan kini’g tukmang paagi aron mapahimuslan na dayon ang ayuda.  Makapahinumdum kini sa anunsiyo sa komedyante’ng tig-balita nga nagkanayon, “Balita, balita! Adunay hinabang nga bugas nga ipanghatag ang gobyerno. Ang sako miabot na apan ang bugas wala pa.”  Pagkatoytoy!