Kinutoban sa palusot

Kon nagtuo si Bise Presidente Sara Duterte nga makalusot hangtod sa hangtod sa mga pasangil sa pangurakot, nasayop siya. Kon masaligon nga kon tabangan na sab sa Korte Suprema kalikayan sa hingpit ang impeachment trial, puwerte niyang sipyata.

Makapakugang ang resulta sa labing uwahing survey sa Pulse Asia: 51.5%, o mayoriya sa respondents sa tibuok nasud nga walay salig niya, nitumbok sa iyang kalambigitan sa korupsyon. Sa ato pa, wala na malingaw ang katawhan sa iyang pasalig nga motubag. Pero sa aktuwal nga buhat nagsige og likay-likay ug langay-langay.

***

Dili makatabang ni VP Sara ang iyang pag-isnab sa impeachment mini-trial sa House Justice Committee. Mosamot lang ang pagduda nga nikakak siya sa pagtubag sa kapin na sa tuig nga mga pasangil sa pagkawat sa confidential funds ug pagtago og ilegal nga katigayonan.

Makapasamot pag-unlod sa iyang kawsa ang pagdangop na sab sa Korte Suprema. Makaangkon og sukaranan ang mga pasangil nga maglisod o wala g’yud siyay ikatubag sa mga ebidensiya sa impeachment complaints maong nidangop na lang sa technicalities ug sa pan-os nang panulisok sa politikanhong pagpanggukod.

***

Mas maapiki pa g’yud si VP Sara kon dili moluwat og temporary restraining order ang labawng hukmanan batok sa mga kongresista karong semanaha. Kinahanglan nga mangita siya og laing mga paagi sa pagpugong sa proseso.

Kay klarong dili siya ganahan nga mabisto ang mga dokumento sa iyang mga negosyo, gibayran nga mga buhis, ug aktuwal nga kita. Nga makumparar sa iyang statement of assets, liabilities and net worth (SALNs) sukad sa 2007 hangtod sa 2024.

***

Ambot unsay dili niya ganahan nga mabisto sa publiko. Pero mahimong niabot nang kinatumyan nga eskina sa iyang mga palusot. Gawas lang kon mopatigbabaw sa ilang utang kabubut-on sa iyang amahan nga maoy nagtudlo sa 12 sa 15 ka mga mahistrado ug magpagamit na sab ang Korte Suprema pagpanghilabot sa eksklusibong gahom sa House ug Senado pagpasiugda sa impeachment proceedings.

Hinaot nga, gawas sa naandan nga lipat-lipat,duna siyay giandam nga tinuod nga panalipod sa iyang kaugalingon. Kay kon ang iyang pagkakak masamotan pa kon mapamatud-an ang iyang mga bakak, segurong moresulta sa iyang kumplito nga paglugapak.