Kahilom ni Sara

Modason ko sa kahibulong ni Bise Presidente Sara Duterte sa makabungog nga kahilom sa administrasyon ni Presidente Ferdinand Marcos Jr. sa pasangil sa 18 ka kanhi marines (bisan kon upat nila wala diay mahimong marines, upat dunay mga kasong kriminal ug mayoriya nataktak tungod sa mga atraso) sa pag-apud-apod nila sa presidente ug ubang mga opisyal sa gobyerno sa ?805 bilyones nga giingong kinawat gikan sa flood-control projects.

Kadudahan ang pipila sa mga pasangil pero gipa-imbestigar unta dayon kon matinud-anon ang imbestigasyon sa ?1.7 trilyones nga flood scam.

Kuwestiyonable sab nganong ang 18 ug ilang mga abogado maoy gisupinahan sa National Bureau of Investigation (NBI). Wala hinuoy rason nga isnabon nilang NBI (kon ganahang ma-imbestigar ang ilang pasangil), pero mahimo ra man gud unta nga gi-imbitar lang una sila og tinarung.

Kon gisupina ang namasangil, nganong wala man supinahi ang mga gipasanginlan? Makalusot hinuong NBI nga wala pay klaro ang mga pasangil ug busa wala pay sukaranan pagpugos nilang Marcos Jr. ug kaubanan pag-atubang sa imbestigasyon (gawas nga dili mangahas ang NBI pag-apiki sa mga nagtudlo nila).

Pero angay sang ipasabot ni VP Sara ang iyang kaugalingong makabungog nga mga pakahilom: Una, sa napamatud-an na sa Armed Forces of the Philippines (AFP) nga pagpangespiya sa China sa operasyon sa gobyerno sa West Philippine Sea (WPS).

Angay siyang mabalaka nga ang nasud nga giingon nga mosuporta niya sa 2028 posibleng dunay daotang tinguha sa atong nasudnong teritoryo (gawas kon uyon sa iyang amahan nga himuon na lang tang probinsiya sa China).

Ikaduha, sa pagbinastos sa iyang alyadong kongresista sa artistang si Anne Curtis (bahala na kon nausab ang palusot sa kongresista gikan sa pagpantasya dihang nakit-an sa Shangri-La ngadto sa paghunahuna ra diay niya, maong gipasanginlan na karon nga artista pero dili babaye ang tinuod nga starring sa iyang pantasya).

Mas maayo pa ang asawa sa kongresista. Kay gawas nga nangayo og pasaylo ni Anne, nagdumili pa g’yud pagtabon sa kabastos sa iyang bana. Hinaot nga wala pa makumbinser si VP Sara sa iyang amahan. Nga walay kapuslanan ang mga babaye mao nga dili angay nga isalig ang nasud sa ilang liderato.