Mas dakong kawat

Imbes magpasalamat na lang sa hilom nga wala morekomendar ang Independent Commission for Infrastructure (ICI) nga pasakaan siya og plunder o bisan unsang kaso, si kanhi House speaker Martin Romualdez wala kapugong sa iyang kaugalingon. Sa pagpatuo nga gi-absuwelto siya sa ICI sa bisan unsang koneksiyon sa ?1.7 trilyones nga flood-control scandal.

Maong nahuksan na hinuon ang ka-desperado sa iyang bakak. Tungod sa pagwara-wara sa iyang mga turutot sa media, napugos ang ICI pagpasabot: Ang wala nila pagrekomendar sa pagpasaka og kaso wala magpasabot nga gi-absuwelto si Romualdez.

Giklaro sa ICI nga ang tinuod nilang rekomendasyon sa buhatan sa Ombudsman, nga klarong gilubag sa press releases sa kampo ni Romualdez, mao nga himoan og dugang imbestigasyon ang mga pasangil nga si Romualdez, isip pangulo sa House, apil sa labing grabeng kinawatay sa kasaysayan.

Napahinumdoman hinuon ang publiko sa nahaunang pasalig ni Ombudsman Boying Remulla: Nga bisan kauban sila og fraternity si Romualdez palig-unon ang ebidensiya nga gitugotan ug gipatuyangan ang kickbacks sa flood-control projects aron pagpalambo sa iyang pamolitika.

Bisan na-apapangig na si Romualdez sa ilang press statement, nanagana pa ang ICI. Wala nila hisguti ang utang ni Romualdez sa ilang imbestigasyon: Gi-isnab ni Romualdez ang imbitasyon sa pagbalik aron tubagon ang mga pangutana sa ICI commissioners parte sa affidavit nga gisumiter ni Romualdez sa una niyang pag-atubang sa niaging tuig.

Ni-rason si Romualdez nga duna siyay medical procedure. Hangtod nga naabtan sa resignasyon sa duha ka commissioners nga nakapa-inutil sa ICI.

Wala na balika nila ni Presidente Ferdinand Marcos Jr. ug Ombudsman Remulla ang pasalig nga dili duphan si Romualdez kon mapamatud-an nga apil sa eskandalo. Sama nga wala nay pahibawo kanus-a ipasaka ang mosunod nga mga kaso ug nganong wala pay bisan usa ka incumbent nga senador ug kongresista nga napriso.

Hinaot nga dili matental si Marcos sa pagtuo nga luwas na siya kay nagtutok nang publiko sa impeachment ni Bise Presidente Sara Duterte. Tan-awon nato asa siya punita. Kon makaamgo ang kinabag-an nga samtang gipasanginlan ang bise presidente og kawat sa minilyon, ang presidente gidudahang nitugot o mao g’yuy utok sa kinawatay sa binilyon.