EDITORYAL - Petron gitanyag

Ang business tycon nga si Ramon Ang, tagiya ug CEO sa San Miguel Corporation nisugyot nga kung gustohon sa gobiyerno sa Pilipinas nga paliton ang iyang kompanyang Petron, dili siya magpanuko sa pagbaligya ani. Matud pa sa negosyante dili na importante niya ang ginansiya ug gani bisan karon wala siya naghunahuna og paginansiya kondili gusto niyang matabangan ang mga Pilipino ning panahon sa krisis sa lana tungod sa kagubot didto sa Middle East.

Ang Petron gipanagiya kaniadto sa gobiyerno sa Pilipinas pinaagi sa Philippine National Oil Corporation (PNOC), apan gibaligya sa panahon ni Presidente Fidel V. Ramos ang 40% nga share niini  ngadto sa Saudi Aramco.

Anang tuiga gihapon, gibaligya sab sa PNOC ang 20% nga share pinaagi sa initial public offerings (IPOs). Karon ang San Miguel Corp.na ang nagdumala sa Petron sukad sa tuig 2009.

Ang Petron lamang ang nag-inusarang oil company sa Pilipinas nga dunay kaugalingong refinery. Ang wala pa maprosesong lana gikan sa Middle East ug uban pang mga nasud anha dad-on sa ilang refinery sa Bataan nga diin 180,000 ka barrels ang ma-prodyus niini kada adlaw ug maoy tigsuplay sa 30% sa panginahanglan sa petrolyo sa tibuok nasud.

Ang ubang mga oil companies limpyo na nga petrolyo ang ilang gi-import apan ang Petron dili kay sila maoy mo-refine niini. Apan sa miaging tuig 2021 gikatahong naalkanse na ang Petron og bilyones ka pesos sa operasyon niini.

Dili na kini bag-o ang pag-offer ni Ang sa Petron ngadto sa gobiyerno, kay niadtong tuig 2021 atubangan sa Kongreso gitanyag na kini apan walay napadulngan.

Niadto lang adlaw nga Lunes, atol sa congressional hearing subling gitanyag ni Ang ang iyang sugyot, matud pa niya pabayran lang niya kini sa gobiyerno sulod sa lima ka tuig.

Kung seryuso gyud ang administrasyong Marcos nga makabaton og kaugalingong kontrol ang gobiyerno sa presyo sa lana dinhi sa nasud, kinahanglang tun-an kining maong sugyot. Kay dili man sa tanang panahon malinawon ang geopolitics sa kalibotan ug pirmeng apektado sa mga kagubot sama sa nahitabo karon sa Middle East ang ekonomiya ug kinabuhi sa mga Pilipino.