Kahadlok ni Sara

Mahimo ra g’yung pasagdan ni Bise Presidente Sara Duterte ang House of Representatives. Kay di man siyang kapugong nila. Ang makabungog nga mayoriya sa mga kongresista nga alyado sa Malacañang moseguro nga ma-impeach na sab siya sa ikaduhang sunudsunod nga tuig.

Mahimo ra g’yud nga itingob ang tanan niyang pangandam sa impeachment trial sa Senado. Kay wala man sab siyay mahimo pagpugong sa mayoriya ni Senate President Tito Sotto sa pagpahigayon sa impeachment trial karong tuiga. Pero duna siyay alas. Siyam niya ka alyado nga senador ang mogarantiya nga ma-absuwelto siya.

Nganong nidangop man ang iyang dumadapig nga mga abogado sa Korte Suprema? Nganong pahunungon na man nila ang impeachment proceedings sa House Justice Committee? Kaingon ba nato nga wala niya hatagi og importansiya maong iyang gi-isnab ang hearings sa mga kongresista?

Dili ba nga ang mga kongresista nga igo ra man nga nituman sa mga lagda nga gitakda sa Korte Suprema? Dili ba nga ang Korte Suprema niinsistir sa pagsubay sa due process bisan sa impeachment proceedings tungod sa mga petisyon nga gipasaka ni VP Sara sa niaging tuig?

Gawas pa, nipasalig si VP Sara dihang gipasaka ang bag-ong impeachment complaints nga nga dugay rang andam ang iyang depensa. Bisan sa wala pa siya ma-impeach sa House sa Pebrero 5 sa niaging tuig nagsugod nang pagtuon sa iyang mga abogado ug abogada.

Wala diay unta silay problema sa pag-atubang sa mga kongresista? Mas makabuylo pa g’yud gani kon adto na sa Senado ipabuhagay ang kinakusgan nilang depensa? Nganong nagpalaban na man sab sa Korte Suprema?

Posibleng rason atong malili gikan sa sulti sa tigpamaba ni VP Sara nga si Atty. Michael Poa: Gawas sa mga husay sa House ug Senado, kinahanglan sang ipasabot ang ilang kawsa sa korte sa public opinion.

Mao kini ang tinuod nilang kahadlok: Kon makabuylo ang mga kongresista pagpaminaw sa tanang testimoniya ug pagbisto sa tanang dokumento nga ilang gisupina, nga nasentro sa giingong kawat ug ilegal nga katigayonan ni VP Sara, mahimong maguba nang ilang kliyente bisan dili pa mapasakang articles of impeachment sa Senado. Nga bisan ang ilang alyadong mga senador dili na maseguro kon modupa pa ba niya.