Sámi oahpahusguovddáš lea gártán gaskkalduhttit dahje botket visot dan ovttasbarggu, mii das lea leamašan Ruoššain. Sivvan lea, go Ruošša fallehii Ukraina.
– Suoma ráđđehus ja oahpporáđđehus leat linnjen ja addán juobe ávžžuhusaid dahkat mearrádusaid. Mii leat mearridan, ahte mii botket ja gaskalduhttit dan ovttasbarggu dál doaisttážii Ruoššain, muitala Sámi oahpahusguovddáža sadjásaš rektor Janne Näkkäläjärvi.
Viiddes ovttasbargu Ruoššain
Näkkäläjärvi lohká, ahte Ruošša falleheapmi Ukrainai lea guoskkahan sin skuvlaveaga olu. Näkkäläjärvi mielde Sámi oahpahusguovddážis lea olu ja viidát máŋggalágán ovttasbargu Ruoššain.
Dasa lassin Sámi oahpahusguovddážis leat bargan earret eará iešguđetlágán prošeavttaid bokte ovttasbarggu eandalitge unnit álbmogiiguin Ruoššas.
Mearrádus ovttasbarggu gaskalduhttimis lea váikkuhan earenoamážit prošeavttaide, muitala Janne Näkkäläjärvi. Sámi oahpahusguovddážis lea jođus ja plánemis moadde prošeavtta, main livčče mielde Ruošša beale doaibmit, organisašuvnnat ja olbmot.
Fállet doarjaga oahppiide, geat gillájit dilis
Sámi oahpahusguovddážis leamaš juoga veardde lonohallanstudeanttat ja -áššedovdit Ruošša bealde. Sadjásaš rektor Janne Näkkäläjärvi lohká dili leat earenoamáš lossat studeanttaide, geat leat Ruoššas eret dahje geain lea duogáš doppe.
– Dat lea min skuvlla bargu dorvvastit goitge dan, ahte juohkehažžii lea dorvvolaš oahppobiras. Háliidan dan deattuhit, ahte našunalitehta dahje eatnigiella ii oaččo leahkit vuođustussan oahppovuoigatvuhtii, dat ii leat mihkkige sivva, dadjá Näkkäläjärvi.
Näkkäläjärvi deattuha, ahte jus sis leat skuvllas oahppit Ruoššas, de sis lea ain dievaslaš ja ovttaveardásaš vuoigatvuohta joatkit stuđerema oahpahusguovddážis.
– Mii leat bidjan návccaid dasa, jus lea dárbu dego ovdamearkka dihte ságastallat eambbo dan dilis, Näkkäläjärvi muitala.
Sámi oahpahusguovddáža oahpahusfuolahusas lea diehtu das, ahte soaitá boahtit ságastallandárbu ášši olis.
Beaivvi ságaid ja Yle Ođđasiid Sámis sáhtát maid guldalit Yle Areenas.