Giehtaruohttasa guovllu olbmot leat vásihan Gilbbesjávrri geainnu erenomáš váralažžan dálvit. Trailerjohtolat lea ságastahttán guovllu olbmuid jo guhká. Ášši várás leat joba vuođđudan iežas Facebook-joavkku, man bokte olbmot váruhit eará johttiid jus ovdamearkan geaidnu lea gitta.
Gárasavvonlaš Minna Juuso johtá barggus Muonás ja lea muhtimin gártán vuordit diibmoviissaid, go trailerbiila lea vuoddján badjel luotta.
– Oktii vurden guokte ja bealle diimmu, ahte beasan idjavuorus ruoktot. Galhan dat suhttadii go ledjen jo ija gohcan. Ovtta eará háveges maŋŋonin njeallje diimmu barggus, go trailer lei čiessan doarrás vustolagas, muitala Juuso iežas vásáhusain.
Vuordá eiseválddiid váldit ovddasvástádusa
Gilbbesjávrri geaidnu lea baski ja doppe vudjet olu stuorra trailerat, main stuorámus oassi leat olgoriikalaš trailerat. Fintraffic dieđuid vuođul golggotmánus 2022 dáhpáhuvve sullii 12 johtolathehttehusa. Sullii beali sivvan ledje trailerat, mat ledje gidden geainnu measta ollásit johtolagas.
Minna Juuso vuordá, ahte eiseválddit válddášedje sin vásáhusaid duođas ja álggašedje ordnet geainnu.
– Orru, ahte áidna čoavddus lea vuolidit leaktoráddjehusa dán geainnus iige dat, ahte álggášedje divvut dan. Dát geaidnuhan lea geassitge heittot ortnegis, olu rokkit.
Olbmot leat nu gallánan Gilbbesjávrri geainnu ortnegii, ahte jahki dassái joba álggahedje nammačoaggima Gilbbesjávrri geainnu jođánis divodeami bealis. Adreassa doaimmahuvvui juovlamánus 2021 riikabeivviide, johtolat- ja diehtojuohkinministeriijai ja EBI-guovddážii, muhto datge ii stuorra bohtosiid leat buktán.
Loga lasi: Gilbbesjávrri geainnu jođánis divodeami bealis čogget dál namaid
Geaidnodoaimmahat: Geainnu olles divodeapmi mávssášii 100 miljon euro
Geaidnodoaimmahagas eai goittot lohpit jođánis divodemiid Gilbbesjávrri geidnui. Prošeaktahoavda Keijo Heikkilä muitala, ahte olles geainnu divodeapmi mávssášii 100 miljon euro ja dan lea váttis fidnet. Geainnu divoditge osiid miel.
Dán rádjái geainnu leat divvon ja govddidan Kolaris Bálojohnjálmmi rádjái. Lagaš jagiid áigge plánan lea divodit geainnu Bálojohnjálmmis Mávnna rádjái, jus dasa fidnejit ruhtadeami.
– Dat lea sullii 50 kilomehtera oassi, ja ulbmilin lea njulget ja govddidit geainnu sihke ođadit šaldiid, muitala Heikkilä.
Dárkilut áigetávvala Heikkilä ii goittot bastte vuos dadjat, goas besset divodit geainnu Bálojohnjálmmis davás. Buot lea gitta das, juolluditgo riikkabeaivvit ruđa geainnu divodemiide boahttevuođas.
Yle Ođđasiid Sámis ja Beaivvi ságaid sáhtát maid guldalit Yle Areenas.