Meahciráđđehus lea fas dán dálvve fuomášan, ahte turisttat joreštit Njoammilguoikka sudderávddas šalddi buohta, muitala Meahciráđđehusa virkkosmahttingeavaheami erenomášáššedovdi Kirsi Ukkonen.
Mátkkálaččaid váralaš láhttenvuohki vuhtto Njoammilguoikkas juohke dálvve. Ná leamašan juo aŋkke logi jagi.
– Lihkus vel ii leat geavvan mihkkige lihkohisvuođaid, muhto gal dat lea stuorra váttisvuohta. Ii dárbbaš go okta bárti šaddat ja dat váikkuha olles guovllu beaggimii, Ukkonen lohká.
Maiddái Roavvenjárggas leamašan sullasaš váttisvuođat. Gávpoga guovddášguovllus jieŋat eai gierdda vázziid eaige gielkkástalliid.
Váruhusain fuolakeahttá jieŋa alde leat oidnon olbmot vaikko báiki lea váralaš. Dán dálvve Roavvenjárgga jiekŋadilli leamašan headju.
Lappi gádjunlágádusa dorvvolašvuođa skuvlejeaddji Riku Mäenpää oaivvilda, ahte olbmo luottat jieŋa alde dájuhit earáige jieŋa ala.
– Máŋgasat jurddašit, ahte go jieŋa alde vuhttojit luottat, de dohkohan sáhtán munge mannat.
Mäenpää muitala dáhpáhusas, go ásialaš mátkkálaš lei čuččodan áibbas sudderávddas. Eará olbmot čurvo su fas gáddái. Son ii leat ádden, ahte jiekŋa sáhttá doddjot.
– Sivva várradiliide lea dávjá diehtemeahttunvuohta. Olmmoš ii ádde, makkár várra dohko lea čihkkojuvvon, muitala Mäenpää.
Turisttat hálidit čáppa gova sosiála mediai heakkaváralaš báikkis
Njoammilguoika Anáris lea erenomáš čáppa báiki. Eandalit dálvit guoika geassá turisttaid go vilges muohtageardi gokčá guovllu ja muoraid čiŋaha assás ritni. Guoikka birrasis mannet maid máŋga vázzinbálgá ja šaldi joga rastá doalvu dolastallanbáikái.
– Ollu olbmot dáppe johtet go báikihan lea fiinnis. Gal dat luottat dáppe oidnojit ollu earáge sajiin johgáttis.
Njoammilguoikka šaldeguoras leat máŋga šiltta, mat váruhit mátkkálaččaid mannamis jieŋa ala. Ukkonen oaivvilda, ahte šilttat eai doarvái bures váikkut olbmuid láhttemii.
– Jáhkán ahte sosiála media lea maiddái dat sivva, ahte galgá oažžut áidnalunddot gova mas čuožžu fiinna báikkis.
Dili lea váttis čoavdit. Ukkonen oaidná ovttasbarggu ovdamearkka dihte hoteallaiguin oktan vejolašvuohtan dieđihit turisttaid áššis.