Anára gielda lea dál čielggadeamen turismma sosiálalaš váikkuhusaid ja čoaggá báikkálaččaid vásáhusaid, mo turismma váikkuha eallinbirrasii, dearvvašvuhtii, kultuvrii ja báikkálaš servošii.

Dainna gažademiin gielda háliida ovddidit vásttolaš turismma Anáris ja geavahit dan maid vuođđun iešguđetlágan turismii guoski fidnuin.

– Turisma lea dehálaš ealáhus midjiide Anára gielddas, dat lea nannosit sturron maŋimuš jagiid áigge ja orru stuorrumin boahttevuođasge. Lea dehálaš, ahte bastit lasihit birrajagi turismma, mii lea vásttolaš ja bistevaš, muitala gieldda ovddidankoordináhtor Marianne Mäki.

Dát gažadeapmi lea oassin Visit Finland vásttolaš turismaprográmma. Gažadeamis jerrojuvvo máŋggabealagit, makkár buriid ja heajos beliid báikkálaččat vásihit turismmas.

– De leat vel namalassii Anár gieldda buohta lasihan gažaldagaid das, mo ovddidit bistevaš turismma ja makkár dat lea ja guđe guovllus Anára gielddas turismabálvalusaid galggašii ordnet, čilge Mäki.

Vástidanáigi gažadeapmái nohká 29. beaivve. Gažadeami bohtosat almmustahttojuvvojit Marianne Mäki árvalusa mielde giđđageasi áigge.

Roavvenjárggas ja Romssas turisma váikkuha earret eará láigovisttiid oažžumii

Dakkár gažademiid leat čađahan maid ovdamearkka dihte Roavvenjárggas ja Romssas. Vástádusaid vuođul roavvenjárgalaččat jurddašit eanáš positiivvalaččat turismmas.

Doppe fuollan goitge loktanii erenomážit visttiid láigoheapmi oanehaš áigái nappo airbnb-doaibma. Lassánan oanehašáiggi láigoheapmi lea lokten visttiid hattiid ja gažadeapmái vástidan olbmuid mielas guhkesáigásaš láigovistti lea váttis gávdnat.

Dasa lassin fuola dagaha maid johtolat ja gávpoga oppalaš dorvvolašvuohta. Vástideaddjit oidnet, ahte gávpoga infrastruktuvra ii leat dássedeattus lassánan olmmošmeriin. Olbmot sávvet ovdamearkka dihte buoret almmolaš johtolaga linjjáid ja čielgasut geaidnošilttaid johtolahkii.

Dán sullasaš vásáhusat leat maiddái Romssas, Norgga bealde. Gažadeami mielde romsalaččat vásihit, ahte turisma lea lokten visttiid hattiid ja lasihan váralaš dáhpáhusaid johtolagas. Dasa lassin báikkálaččat leat fuolas das, mo turismma váikkuha lundui ja birrasii ja vásihit, ahte turisttat leat jo menddo olu.