Deanu guovllus leat máŋggat láigostohpofitnodagat, gos leat vel jagiid dassái leamašan dievva olbmot ja guolásteaddjit. Dál leat fatnasat goikásis. Vaikko luossaturisma ii šat gease olbmuid Deanu gátti bálvalusaide, leat muhtin johttitge leamaš, muitala Tenon tunturituvat -fitnodaga eaiggát Otto Paltto.

– Bures gal leamašan dien dáfus, maid leamašan dilli dáppe. Álggoshan dalle go bohte buot gildosat, korona ja buot oktanaga, lei váikkuhus stuoris dán guovllus.

Paltto muitala, ahte maid oahppásat ja guovllu olbmot fidnet gáfestallame ja hálešteamen.

– Miihan eat dálvit nuppiid gal olus oainne, geasi áigge dás de háleštallat ja buoridit máilmmi, čaimmiha Paltto.

Joga alde eai goit olbmot dihtto.

– Dálhan eai leat láigofatnasat, dat leat visot goikásis dáppe.

Vaikko maŋimuš jagiid áigge Deatnu lea jaskkodan, Paltto goit áigu joatkit fitnodatdoaimmain nu guhká go lea dearvvaš.

– Jos seaŋgavuđđui báhcá veallát, dat gal lea vel heajut.

Stobuid láigoheapmi buktá vehá lubmaruđaid, dadjá fitnodatdoalli

Fitnodatdoalli Kari Guttorm láigoha stobuid Deanu gáttis, muhto dál eai leat olu šat olbmot johttán. Guttorm lohká, ahte maŋimus njeallje jagi guossin leat fitnan ustibat.

– Iihan dat leat šat go moadde proseantta das, maid mii leat láigohan ovdal, lohká Guttorm.

Guttormas gal reahkkájit doaimmat ja barggut, vaikko láigohandoaibma lea dál jaskkodan.

– Eat mii Ohcejogas sáhte dasa váikkuhit. Váivihan dat lea dieđusge. Ii dasa sáhte olu, šiljuid čorgestallat jus gii nu láhppo dohko, moddjesta Guttorm.

Guttorm fitnodagas leat ollu iešguđet doaimmat, muhto dušše stobuid láigoheapmi ii ealit.

– Das vehá lubmaruhta boahtá, gáffegohpu fidne ja vehá sáhttá liegga mállása borrat oktii vahkui, muitala Guttorm.

Otto Paltto oaivvilda, ahte ovdalaš áiggit eai boađe šat ruovttoluotta. Son goit vel vuordá buoret gesiid.

– Boahtte giđđa go boahtá, mii vuordit ahte amma dat dál lea buoret geassi.