Drona geavaheapmi lea lassánan boazodoalus olu ja boazodoallit ieža oaivvildit, ahte dainna bastá seastit luonddu. Juvlavuojániin vuodjimat geahppánit drona dihte.
Drona man Ergona siidda Henri Proksi girddiha, máksá duhát euros beannot duháhii. Gávdnojit maiddái dakkár dronat, maid kámerat bastet áicat lieggasa bokte vaikko bohccuid. Dat mákset golmma duhát euros bajá sguvlui. Daid ii eambo oastil.
– Dat lea divrras investeren, go eai daidda oaččo doarjagiid. Ii daid sáhte oasttašit jámma, dadjá Proksi.
Servodat fertešii investeret duottarluonddu suodjaleapmái
Sámi dálkkádatráđi ságadoalli Lemet Näkkäläjärvi mielas servodaga ruđalaš doarjagiin livčče ávki lundui.
– Jus dat livčče boahtit boazodoalusge investerendoarjaga vuollásažžan ja dasto vel árvolassivearu vuollásažžan. Gal dat livčče stuorra veahkkin. Dalle dan livčče sáhttit vehá smiehttat, ahte leago dárbu juohke sadjái vuolgit máŋggain juvlavuojániin vuodjit, muitala Näkkäläjärvi.
Sámi dálkkádatráđđi ii politihkke, baicce lea sorjjasmeahttun doaibmi. Go lea sáhka duottarluonddu suodjaleamis, sis lea vejolašvuohta doalvut sáni mearrideaddjiide, lohpida Näkkäläjärvi.
– Jus mis lea čielga čujuhus, ahte mii bastit dieinna duottarluonddu suodjalit, galhan dat servodat ferte dasa dahkat dakkár investerema. Diekkár signálaid gal doalvut dohko mielas, loahpaha Näkkäläjärvi.
Teoriijas vejolaš ohcat investerendoarjaga
Ovdamearkka dihte mohtorgielkká dahje njealje- ja guđajuvlláriid oastimii sáhttá ohcat investerendoarjaga. Dat lea sullii 20–35 proseantta dohkkehuvvon goluin. Investerendoarjaga sáhttá oažžut jus deavdá dihto eavttuid.
Eana- ja meahccedoalloministeriijas dadjet, ahte boazodoalu ja luondduealáhusaid ráhkadusdoarjagiid lágas daddjo, ahte boazodoallái lea vejolaš mieđihit doarjaga boazodoalus dárbbašlaš investeremiidda. Dat galget beavttálmahttit, buoridit kvalitehta, dorvvastit doaibmanvejolašvuođaid ja maiddái veahkehit ealáhusa vuogáiduvvama ođđa dillái dahje gáibádusaide.
Eana- ja meahccedoalloministeriijas nannejit, ahte drona oastimii lea teoriijas vejolaš ohcat doarjaga muhto dan eai vealttakeahttá mieđihivčče.
Dálá dilis boazodoalu investerendoarjagiidda ja bajásdoallamii lea várrejuvvon guokte miljovnna euro, iige dan supmi eanet sáhte mieđihit doarjagiid.
Árvolassivearu máhcaheamis eat ožžon mearreáiggis vástádusa vearuheaddjis. Norggas sámediggi doarju goasnu boazodoalliide drona háhkama.