Anarist páiháliih tuhhiitteh mađhâšem viehâ pyereest, mut páihálij uásálistem miärádâsâid kolgâččij pyerediđ. Taat poođij oovdân Spirit of Inari -mađhâšemseminaarist, mast Miikka Raulo Flowhousest oovdânpuovtij Aanaar ässeekoijâdâllâm puátusijd.
– Čielgâsávt mij lep vala mađhâšem raajij siste. Mađhâšmist feerejeh, et tot puáhtá pyereest eellimvuáimálâšvuođâ já pargosoojijd sehe pyereed palvâlusâid, mut láá meid ääših, moid mij kolgâp kiddiđ huámášume mađhâšem vuáváámist, Raulo muštâl.
Ässeekoijâdâlmân västidij jyehi lovváád Aanaar kieldâ ässein. Huolâstuttee puátusin Raulo puovtij oovdân, et 58 prosentid västideijein tubdii, et sij iä paste uásálistiđ mađhâšem ovdedempargoid.
– Páiháliih ulmuuh láá tuođâi merhâšittee roolist tast, et kyesih tobdeh, et láá tiervâpuáttim. Koijâdâllâm pyevtittij paijeel 2200 ávus vástádâssâd, main lijjii uáli konkreetlâš čuávdusiävtuttâsah, Raulo juátká.
Uđâsmittee mađhâšem já siärváduv rooli tiädutteh Anarist
Moonnâm ohhoost Anarist uárnejui jo čiččâd keerdi Spirit of Inari -mađhâšemseminaarân. Taan ive válduteeman lâi uđâsmittee mađhâšem – jurdâččemvyehi, mast mađhâšmist kalga kepidiđ hááituid, mut meid pyehtiđ kuávlun eenâb äävhi ko maid tot váldá.
Náguskirjetotkee Salla Jutila Laapi ollâopâttuvâst kommentistij puátusijd sosiaallâš toimâlove uáinust. Sosiaallâš toimâlope uáivild páihálii siärváduv tuhhiittem monnii tooimân.
– Páihálij ässei tuhhiittem lii uáli tehálâš, ko taggaar mađhâšem, mii lii páihálij siärvusij tááhust tuhhiittettee, te tot miänástuvá, Jutila tiäddut.
Jutila viärdádâl Aanaar tile Ruávinjaargân, kost mađhâšem lii lasanâm jotelávt.
– Ruávinjaargâst sosiaallâš toimâlope lii mottoom uásild čielgâsávt pieđgânmin. Mađhâšem tuhhiittem uáinoo čielgâsumosávt tast, ko tááláá ääigi savâstâleh uánihislaiguutmist, Jutila iätá.
Aanaar kieldâ eellimvyeimijuáhus saavâjođetteijee Jaana Seipiharju tiäddut siärváduv rooli mađhâšem oovdedmist.
– Uđâsmittee mađhâšem ulmenhân lii tot, et miinii macâttuvvoo pyerrin ton kuávlun, ige tuše ruuđâ tiänám. Mii siärvádâh lii aktiivlâš, mii lii ohtâ merhâšitteemuin aašijn, Seipiharju paahud.
Páihálii siärváduv jienâ kullumnáál meid puátteevuođâst
Seipiharju mield Anarist lii jo ovdláhháá rahtum mađhâšem vuávám, mon ohtâvuođâst uárnejuvvojii almosčuákkimeh já koijâdâlmeh páihálij uáinui vuotânväldimân.
– Ko siämmáš proosees vuálgá joton tääl Avelist já Suáluičielgist, te siärvádâh váldoo fáárun. Ornip kuullâmtilálâšvuođâid já ohtsijd savâstâlmijd. Tot lii tehálâš, Seipiharju muštâl.
Raulo tiäddut mađhâšemtuáimei ovdâsvástádâsâst.
– Vâi siäiluttep sosiaallii toimâlove, puoh mađhâšemtuáimeeh taan kuávlust ferttejeh koijâdiđ, taha-uv mađhâšem pyere mii páihálâš siärvusân.