Sámis leamašan maŋimuš vahkuid ja beivviid áigge garra buollašat. Eanodaga bealde leat mihtidan measta -40 gráđa buollašiid. Ovdamearkka dihte mannan bearjadaga mihtiduvvui Eanodagas Gilbbesjávrri giliguovddážis 39,9 gráđa buolaš.

Buollašat soitet leat oalle vásáhus olgoriikalaš turisttaide, geat eai leat hárjánan ná garra buollašiidda. Hollándalaš Liesbeth Weinans lei boahtán vásihit dálvvi ja muohttaga Anárii.

Son dadjá, ahte ii lean ráhkkanan dákkár ruostibuollašiidda.

– Lea gal hui galmmas. In dieđe mo livččen birgen, jus in livčče ožžon liegga biktasiid hoteallas.

Weinans lea váldán mátkki Sápmái ja buollašiid stuorra fearánin.

Hoteallat rávvejit turisttaid mo birget buollašin

Wildernes Hotel Juutua jođiheaddji Pirita Portti muitala, ahte garra buollašat eai leat olus váikkuhan turisttaid prográmmafálaldahkii.

– Buot prográmmat leat vuolgán johtui nugo leamaš dárkkuhusge, muhto muhtin fálaldagaid leat dahkan vehá earáláhkai. Ovdamearkka dihte dál mannat dušše guossái huskyfarmii, muhto ii leat beanaráidovuodjin.

Portti muitala, ahte sii rávvejit ja veahkehit turisttaid birgehallat buollašis.

– Juohke turista oažžu buriid biktasiid ja maid gápmagiid, maiguin birget buollašis.

Muhtin turisttat goittot eai dalán fuola hotealla fáluhan liegga bivuid, go leat ieža oastán biktasiid Sámi-mátkki várás. Muhto go leat finadan olgun buollašis, de váldet iluin vuostá hotealla liegga bivuid, muitala Portti.

Meteorologa ii lohpit vel bivvaliid

Anárii, Ohcejohkii ja Eanodahkii lea vel goit otnážii duorastahkii einnostuvvan vuollel -30 gráđa buollašat.

Yle meterologa Matti Huutonen dadjá, ahte bivvaliid lea vel dušši vuordit.

– Gal čuovvovaš beaivvit leat ain galbmasat. Alladeaddu bissu ain Lappi alde lagaš beivviid áigge ja dat mearkkaša, ahte bivvalat eai leat vel dieđus.