Jaana Janhunen oroda isidiinnes ássanbiillas ja johtá barggus miehtá Sámi. Maŋimuš áiggiid son lea bargan Gáregasnjárgga bálvalandálus.

Álo ássanbiillas orrun ii goittot leat nu álki. Ovdamearkka dihte mannan vahkus garra buollašat bukte hástalusaid.

– Ássanbiilla liggenrusttet bieđganii. Lihkus báikkálaš fitnodatdoallit veahkehedje, ja oaččuime ássanbiilla lieggasii ovdal go dolliime Roavvenjárgii divuhit dan, muitala Janhunen.

Janhus guovttos leaba válljen ássat jo moadde jagi ássanbiillas eabage heađástuva duššis. Jaana Janhunen giitala, go oaččuiga veahki go dárbbašeigga ja rámiidage Gáregasnjárgga olbmuid.

– Moai dihte, ahte sáhttá geavvat vaikko mii ja elle dan mielde. Dán gili olbmot leat olu veahkehan ja jearadit álo, ahte birgejetnego ja dárbbašetnego veahki.

Friijavuohta geasuhii orrut ássanbiillas

Jaana Janhunen ja su isit ásaiga ovdal Helssegis. Muhtin beaivve soai mearrideigga luohpat ássanviesus ja vuovdit stuorámus oasi opmodagas eret ja fárret ássanbiilii.

Ovtta beaivve son oinnii tv:s ođđasa, ahte Gáregasnjárgii dárbbašit divššáriid bargui. Son riŋgii hovdii ja oaččui barggu. Vuosttas geardde go bođii Ohcejohkii bargui, lei buolaš 37 gráđa.

– Dalle smiehtastin vuosttas geardde, ahte maid árpmuid moai letne mannan bargat, bohkosa Janhunen.

Friijavuođadovdu lea goittotge dat, mii Janhus guoktá lea geasuhan hukset eallima ássanbiilii.

– Moai sáhtte mannat gosa beare hálidetne. Mun sáhtán johtit barggus vehá gosge, eange leat čadnon ovtta báikái, dadjá Jaana Janhunen.