Áŋŋellaš boazodoalli Ritva Torikka čákŋala olgovistái gos bolstarat vel leat láhttis. Doppe lea ásadan váibbat nulpu. Olgovisttis orodeami lassin nulpu lea ožžon gubmo muhto maiddái ođđa áigásaš ealáskahtti.

– Mii attiimet dasa dakkár boosteri, go dat ii hálidan borrat. Dakkárin mainna dálkasa addet, de njuolga dainna njálbmái buusteri. Dat vehá veahkehii, ahte dat baikigođii, muitala Torikka.

Dasto leige beare čuovvut eallágo vai iigo. Sii jotke energiijajuhkosa ja gubmo addima.

– Leigoson dat njealját dahje viđát beaivve, go eahkedis dat vehá borragođii jeahkála. Mii jotkkiimet dainna buusterin ja jeahkáliin. Vehážiid mielde borragođii ja friskkodii, čilge Torikka.

Energiijaliemaid vuovdin lea lassánan

Bohccuide oaivvilduvvon energiijaliemat leamašan vuovdemassii dál sullii guokte jagi. Jurdda daidda lea vuolgán namalassii dárbbus, muitala Elina Röyttä-Rouhiainen Hankkija-fitnodagas.

– Jurdda dáidda lea vuolgán boazodoalliin. Sii leat fuomášan dárbbu. Orui, ahte ii lean eará ráđđi ja dasto álge plánet dán buktaga, muitala Röyttä-Rouhiainen.

K-Rauta gávpejas Jouko Strandas leat golbma gávppi. Son muitala, ahte su gávppiin dáid boosteriid vuovdin lea lassánan logi proseanttain, jus veardida diimmá loguide. Strand mielde boazodoallit leat ráhkkanan ja sihkkarastán, ahte ožžot buktaga, go vuordimis lea dárbu daidda.

Ii gánnit addit menddo guhká, iige menddo olu

Anára gieldda šibitdoavttir Henna Kaarakainen muitala, ahte justa dáid áiggiid lávejit boazodoallit váldit oktavuođa nelgon dahje váibbat bohccuid dihte.

Bohccuid energiijaveahkit leat sutnje oahppása. Propyleeniglykoli lea okta man geavahit addit energiija.

– Daid gánniha geavahit álgomuttus, muhtun beivviid áigge. Dan ulbmilin lea loktet bohcco varrasohkkara ja lasihit borranlusttu, čilge Kaarakainen.

Menddo guhká ii gánnit energiijajuhkosiid addit, daningo boazu luhčugoahtá daid dihte viehka jođánit, joatká vel Kaarakainen.

Šibitdoavttir rávve álggahit biebmama vehážiid mielde ja addit lastaluvddáid, jeahkáliid ja lahpuid. Váibbahii gánniha addit čázi, ii muohttaga. Dakkár čázi maid sáhttá addit mas leat luvvadan jeahkáliid.

– Go boazu lea muđui jo heajos ordnegis, muohttaga suddan bohcco gorudis golaha olu energiija, čilge Kaarakainen.

Kaarakainen rávve maid geavahit gubmoliema. Go njuovada, de váldá dearvvas bohccos gupmo ja galmmiha dan. Go lea dárbu, de váldá moadde čorpma dievva gubmo, sehkke dan čáhcelihtterii, sille ja de sáhttá dan addit moatti beaivve áigge.

Sávvá buoret dálkkiid bohccuide

Ritva Torikka lea fuolas eandaliige čearpmahiin. Son smiehttá, gávdnetgo dat guohtuma, go nu guhkes buolašáigodat leamašan.

– Dat lea váikkuhan. Min bohccot leat boahtigoahtán buollašiid áigge šilljui ja vurdet ahte dáppe livčče eanet biebmu. Dat dárbbašit eanet energiija.

Torikka sávvá, ahte bivalda ja muohtášii vehá vai dat muohta dimašii.

– Giđđahan lea vel guhki ja vel njukčamánusge lávejit buollašat, ii dan dieđe makkár dálkkit bohtet. Dán áigge dat lea nu árvitmeahttun.