Ohcejoga girku gižaldagat gollet dál go olbmot gurgalit ipmilbálvalussii. Sin geasuha girkostallan go doppe lea ipmilbálvalusa doallamin máilmmi dovddus musihkkanásti.
The 69 Eyes -joavkku lávlu Jyrki Linnankivi lea studeremin teologiija ja dahkamin báhpahárjehallama Ohcejoga searvegottis. Hárjehallen bistá guhtta vahku.
– Ii lean vuosttas geardi gal, lean doallan jo moadde sártni Helssegis. Dáppe davvin goit lea vehá earálágan.
Searvegoddelaččat ledje duđavačča dasa maid gulle. Eeva-Liisa Rasmus-Moilanen lei boahtán iežas ustibiin gutnagaskavahku ipmilbálvalussii. Son rámiida báhppahárjehalli.
– Iešalddes Jyrki birgii bures. Dat lei miellagiddevaš, muhto lei hui somá ustibiin boahtit deike ja leahkit ovttas maiddái suinna, son dadjá.
Linnankivi ieš lei eanemus duđávaš iežas sárdnái, muhto moatti sajis son lei vehá gealdagasas.
– Muhto ii lean koanstajierpmi dahkan, baicce albma olmmoš dan logai, son leaikkastallá.
Linnankivi mielas sárdni lea dehálaš oassi ipmilbálvalusa. Son sávvá, ahte basttášii dahkat dakkár sártni, mii jeđđe ja movttidahttá olbmuid.
Ipmilbálvalusa ledje boahtán čuovvut moaddelot olbmo. Báhppahárjehalli ii goittot leat behtton.
– Ipmilbálvalus ii leat konsearta. Dohko eai vuovdde bileahtaid. Searvegoddi lea báikki alde inge mun goittot dál smiehta, ahte man galle olbmo dáppe čohkkájit, dadjá Linnankivi.
Ohcejoga girkohearrá Anu Sorjonen muitala, ahte Linnankivi báhppahárjehallan lea boktá stuorra beroštumi.
– Gutnagaskavahku ipmilbálvalusas ledje dán háve mealgat eambo olbmot go dábálaččat, son muitala.
Báhppahárjehalli lea maid viššalit beaividan searvegotti sosiálamediaid kontuid ja juksan duháhiid olbmuid.