Gieskat šattai ságastallan sosiála medias das, makkár oktavuođas iešguđetlágan luđiid sáhttá ovdanbuktit. Dan ságastallama álggahii juoigi Simon Issát Marainen, go su vielljarohki Gustu luođis ledje dahkan feastaluođi jearakeahttá bearraša lobi.
Marainen ii áinnas háliit gieldit juoigama, baicca váldogažaldat leage makkár oktavuođas ja makkár ulbmiliin juoigá.
– Lea hui dehálaš gulahallat ja váldit oktavuođa, ahte orrugo heivvolaš maid áigu dahkat. Go váldá muhtin luođi lávdái ja ráhkada das feastaluođi, de mu mielas galggalii leahkit dat vierru ja dáhpi, ahte don jearat olbmos, leago ortnegis, orrogo heivvolaš, ávžžuha Marainen.
Ášši goit čoavdašuvai, go dán feastaveršuvnna dahkan olbmot válde Maranainenii oktavuođa ja šállošedje ášši.
– Gulahallan lea dás čoavddasátni ja áinnas juoigabehtet Gustu ja earáid gudnin ja muitun. Jus min ila sakka álgit ráddjet ja gieldit, de mii leat boasttogeainnu nalde. De soaittát fuomáhaga hávkadit ráhkis ja divrras juoiganárbevieru, čálii son almmolaččat sosiála medias.
Musihkkár ja dutki Anna Näkkäläjärvi-Länsman lea maid čuvvon dán ságastallama sosiála medias. Son guorahallá nákkosgirjedutkamušasttis luođi ja dan, mo juoigama sáhtášii máhcahit oassin árgabeaivvis.
Näkkäläjärvi-Länsman oaidná, ahte dat lea buorre ovdamearka das, ahte galgá hui dárkilit vihkkehallat ovdal go ovdanbuktá almmolaččat muhtin luođi, jus ii dovdda dan duogáža.
– Dat lea hirbmat buorre, ahte Simon Issát leat rahpasit muitalan dan, maid son jurddaša dan áššis ja ahte son lea iešalddes bidjan maid servvodaga jurddašit dan, ahte mo mii galgat ehtalaččat smiehttat luđiid ja daid dahkkivuoigatvuođaid.
Luođi oamasteamis lea dehálaš ságastallat
Dán ságastallamis leat čujuhan olu maid dahkkivuoigatvuođaide. Árbevirolaččat luođis šaddá dan olbmo, ealli dahje vaikkeba báikki luohti, gean dahje man juiget.
Danin lea dehálaš leat várrugas luđiiguin, muittuha Simon Issát Marainen.
– Muhto ná árgabeaivválaččat, ii das leat mihkke hehttehusaid juoigat nuppi. Mii galgat dan ain beare joatkit nu ahte min ráhkis juoiganárbevierru ain seailu ja ain eallá ovddosguvlui, son deattuha.
Anna Näkkäläjärvi-Länsman lea ovtta oaivilis Maraineniin.
– Mishan leat ollu boares luođit, vádjolan olbmuid luođit, maid mii ainge muitit ja olbmot juiget daid.
Ođđasut luđiin fas lobi galgá jearrat sis, geaidda dat luohti gullá. Árbegoddi oamasta vádjolan olbmo luođi.
– Gii lea áigá vádjolan, de dallehan olles árbegoddi oamasta dan luođi. Don fertelit jearrat dan lobi oba árbegottis, muhto iihan dat dieđusge leat vejolaš, muhto sáhttá ovtta olbmos jearrat dahje oažžut oktavuođa juste dien sohkii ja jearrat lobi, dadjá Näkkäläjärvi-Länsman.
Anna Näkkäläjärvi-Länsman lea duđavaš, go dát fádda lea loktanan almmolaš ságastallamii. Su mielas lea dehálaš ságastallat luođi ehtalašvuođas ja árbevieruin, vai nuorat buolva maid oahppá.
– Dat lea dieđusge ovttaskas olbmuid árbi, dat lea bearrašiid árbi, dat lea sogaid árbi, muhto dieđusge dasto lea maiddái min oktasaš árbi, go daid buot luđiid bidjá oktii. Luohti lea dego dat olmmoš, de dathan lea nugo soapmása bearášlahttu.