Suoma davimus mátkefitnodateaiggát Eemeli Hekkanen lea váldán Njuorggáma luopmoguovddáža háldui gieskat. Fitnodat sirdašuvai sutnje su vánhemiin. Hekkanen dadjá iežas leat juohke báikki heavval, dálualmmái ja fitnodatdoalli.

Sus goittot leat veahkki lahka go eadni ja áhčči leaba lohpidan leat skihpárin moadde jagi nu, ahte ii dárbbaš buot hálddašit dalánaga.

– Mun lean šaddan dán bargui. Gávcci jagi lean plánen ja mus leat ollu jurdagat mo ovddidit fitnodaga, muitala Hekkanen.

Nuorra fitnodateaiggádis ii leat dán vuoro mihkkige fuollan iige morašin, vaikko iihan dan dieđe mii máilmmis dáhpáhuvvá.

Lappi turismmas lea garra leaktu. Dál goittot lea juo veháš dássášuvvan dilli vaikko ballun leage, ahte turisma lassána menddo ollu stuorra guovddážiin, oaivvilda Hekkanen.

– Nuppe dáfus dál turisma golgá maid deikke guvlui ja áidna fuolla lea dat mo luondu gierdá máddelabbos.

Jiekŋamearra geasuha

Son muitala, ahte ovttasbargu ovdamearkka dihtii eará fitnodagaiguin doaibmá davvin. Avvilis vudjet bussesáhtuid Njuorggámii, Roavvenjárggas fas dahket guhkes mohtorgielkásafárii deikke ja Anáris fas leat safarifitnodagat, mat vuojašit Njuorggámis.

– Dáppe lea Jiekŋamearra lahka ja dat geasuha. Geassit suopmelaččat mannet dohko ja dálvit fas olgoriikkalaččat, čilge Hekkanen.

Sii dolvot dálvit kundariid maid Norgga beallái vuojašit beatnagiiguin.

– Lagaš gielddain Norggas eai leat mátkefitnodatdoaimmat ja hoteallatge leat guhkkelabbos nu, ahte dan guovllus eai boađe turisttat deikke.

Sis bistá alimus sesoŋŋa juovlamánu álggus gitta cuoŋománu lohppii ja dan maŋŋá beasságe veháš bosihit ovdalaš geasse-, čakča- ja dálvebaji, muitala Hekkanen.

– Dat lea birra jagi doaibma dál, dadjá Hekkanen.

Luossabivdogielddus ii dihtto kundariid mearis

Luossabivdogielddus Deanus dagahii dušše dan veardde váttisvuođa, ahte olbmot riŋgestallet ain giđđat ja jerret, ahte oažžugo guolástit.

– Dat ii leat goittot dihton kundariid mearis, dadjá Hekkanen.

Sutnje dat mátkefitnodatdoaimma lea eallinvuohki.

– Dás ferte liikot nu, ahte viššá bargat. Mun lean vuostáiváldima duohken leamašan áibbas mánnávuođa rájes.