Stáhtaráđđi lea duorastaga ásahan ovttas Sámedikkiin ja Nuortalaččaid siidačoahkkimiin koordinašuvnna- ja čuovvunjoavkku.
Joavku galgá leat doarjjan parlamentáralaš bargojovkui, mii vihkkehallá duohtavuohta- ja soabadankommišuvnna ávžžuhusaid. Parlamentáralaš bargojoavku ásahuvvui 2025 skábmamánus.
Koordinašuvnna- ja čuovvunjoavkku ulbmilin lea doarjut parlamentáralaš bargojoavkku barggu ja sihkkarastit, ahte duohtavuohta- ja soabadankommišuvnna evttohusaid gieđahallet ovttasbarggus sápmelaččaiguin.
Joavku maiddái ovddida duohtavuohta- ja soabadankommišuvnna loahpparaportta dieđu joavdamis Suoma servvodahkii ja stáhtahálddahussii.
Stáhtaministtar Petteri Orpo muitala, ahte diibmá ásahuvvon bargojoavkku bargu lea vuolgán bures johtui. Dál ásahuvvon bargojoavku dáhkida, ahte kommišuvnna ávžžuhusaid giehtadallet ovttasbarggus sápmelaččaiguin.
Go parlamentáralaš bargojoavku ásahuvvui de gullui kritihkka das, ahte áššis eai lean virggálaččat gullan Sámedikki eaige Nuortalaččaid siidačoahkkima. Sámedikki ságadoalli sadjásaš Tuomas Aslak Juuso lohká, ahte dat bijai Sámedikki dillái, gos fertii smiehttagoahtit čuovvovaš lávkkiid.
– Ságastalaimet olu maiddái politihkalaččat, ahte guđe láhkai mii sámit fertet oažžut dakkár proseassa áigái, gos mii leat oassebealit áššis.
Ođđa koordinašuvnna- ja čuovvunjoavku ásahuvvui čoavdit dán váttisvuođa. Juuso lohká ahte kommišuvnna raportta doaibmabijuid duohtandahkamii livčče sáhttán leat stuorra hástalus, juos sápmelaččaiguin ii livčče njuolga ságastallojuvvon.
– Juos geahččá álgoálbmotvuoigatvuođaid prinsihpaid, de dan mieldehan dat oassálašvuohta ja ovttas dahkan lea áibbas čielggas.
Koordinašuvnna- ja čuovvunjoavkku ságadoallin nammaduvvui stáhtaráđi kansliija stáhtačálli Risto Artjoki ja várreságadoallin riekteministeriija kansliijahoavda Antti Leinonen.
Ođđa jovkui gullet vel Sámedikki ságadoalli Pirita Näkkäläjärvi ja várreságadoallit Leo Aikio ja Tuomas Aslak Juuso. Joavkkus leat mielde maiddái nuortalaččaid ovdaolmmoš Veikko Feodoroff, nuortalašráđiid ovddasteaddjit Joni Gauriloff ja Terhi Harju, Johanna Suurpää riekteministeriijas ja Harri Martikainen stáhtaráđi kansliijas.
Veikko Feodoroff muitala, ahte ođđa bargojoavkku ásaheapmi ii lean álki.
– Gal olu fertiimet botnjat ja kompromissaid dahkat ahte makkár mandáhtain ja doaimmain dát bargojoavku galgá doaibmat.
Sus lea goittot luohttámuš, ahte bargojoavkkus lea ávki ja dat lea goit buoret go ii mihkkige. Feodoroff jáhkká, ahte ovttasbarggus boahtá leat maiddái sápmelaččain vejolašvuohta váikkuhit.
Tuomas Aslak Juuso lea maiddái positiivalaš mielain jođus joavkku ektui.
– Mu ipmárdus lea ahte stáhtage bealde válljejuvvon olbmuin lea dáhttu ja indu vuolgit dainna bargguin johtui, lohká Juuso.