Oahpahusministtar Anders Adlercreutz lea galledan vahkuloahpas Sámis. Son hálidii gullat, makkár áššit ságastahttet guovllu olbmuid.
Ministtar deaivvai Davvi-Lappi gielddaid ovddasteaddjiid Eanodagas lávvardaga. Oktan fáddán loktanii unna gielddaid unna skuvllaid boahttevuohta, ovdamearkka dihte Eanodaga ja Ohcejoga logahagat.
Adlercreutz mielas lea Lappi guhkes gaskkaid dihte dehálaš fuolahit ovttaveardásaš vejolašvuođa nuppi dási skuvlejupmái.
– Eandalit nuppi dási skuvlejumi ektui lea ballu, ahte guhkes gaskkaid dihte skuvlenvejolašvuođat gáržot ja dat ii leat geange ovdu, dadjá Adlercreutz.
Maiddái rádjeguovllu hástalusain muitaledje ministtarii. Ministtar oaidná ovttasbarggu dehálažžan rájáid rastá, vaikko leatge hástalusat.
– Skuvlenáššiin, gávpesuorggis ja ealáhusdoaimmain lea buorre bargat ovttas, deattuha Adlercreutz.
Ministtar rámidii Eanodaga olbmuid ja márkaniid
Ministtar Adlercreutz beasai maid vásihit vuosttas geardde Márjjabeaivve doaluid. Son lea muhtin háve vuoddján Heahtá meattá, muhto ii leat goasse bisánan gilis guhkit áigái.
– Dáppe lea suohtas. Somá, ahte olbmot bohtet ságastallat. Orru geahppasut atmosfeara go Mátta-Suomas. Olbmuin lea buorre miella. Ja várra giđđabeaivvášge váikkuha positiivalaččat.
Ruoŧŧelaš álbmotbellodagas lei tealtá guovdu Heahtágili ja olbmot finadedjege viššalit dearvvaheamen ministtara.
– Moadde buorre ságastallama leat jo gevvon, rámiidii ministtar olmmoščorraga gaskkas.