Anáris gahčai bearjadaga iđitbeaivve helikopter. Gádjunlágádusas muitalit, ahte seaivuma oktavuođas helikopter lea gahččan ja oalát billašuvvan Ruossaváris. Áššis muitala gohccibuollimeašttir Pekka Siivola.
Rihkuskomissára Iikka Rantahalvari Avvila bolesis muitala, ahte helikopteris ledje njealje olbmo geat ledje buot suopmelaččat ja eret iešguđet guovlluin Suomas. Helikopteris lei girdi ja golbma mátkkošteaddji ja sii ledje guolástanmátkkis. Oktage ii roasmmohuvvan lihkohisvuođas.
Norgga gádjunhelikopter evakuerii olbmuid.
Rantahalvari muitala, ahte helikopter lei seaivume ja nubbi jálás darvánii dipmá muohttagii ja seammás bieggaoalli bosostii gomihii helikoptera.
Helikopter lea lihkohisvuođabáikkis ja dat lea oamásteaddjis lea das ovddasvástádus.
– Boles lea ságastallan helikopteris leamašan olbmuiguin ja eará dutkamii ii leat dárbu. Lihkohisvuođadutkanguovddážis lea diehtu áššis. Doppe de árvvoštallet dutkagohtetgo ášši, Rantahalvari muitala.
Gádjunlágádus oaččui almmuhusa unna áibmojohtolatlihkohisvuođas Njávdáma lahkosii Ruossavárrái diibmu 11 maŋŋá bearjadaga.
Báiki lea lahka Norgga rájá.
Flightradar24-siiddu mielde Norgga helikopter finai báikki alde ja diibmu 13.49 dat seaivvui Avvila girdigieddái. Yle doaimmaheaddji mielde maiddái boles lei Avvila girdigiettis dalle.
Ođas divvojuvvon 27.3 diibmu 16.51 divvojuvvon diehtu, ahte oamásteaddjis ovddasvástádus lihkohisvuođas leamašan helikopteris, ii fitnodagas nu mot árat muitaleimme.
Ođas beaiváduvvon 27.3.2026 diibmu 16.19 lasihuvvon diehtu, ahte helikopteris leamašan olbmot ledje suopmelaččat.
Ođas beaiváduvvon 27.3.2026 diibmu 15.59 bolesa dieđuiguin ja bajilčála ja tevstta hápmi beaiváduvvon.
Ođas beaiváduvvon ođđa dieđuiguin diibmu 13.39.
Ođas divvojuvvon 27.3.2026 diibmu 12.02. Álggos muitaleimmet, ahte báiki lea lahka Ruošša rájá, muhto dat lea lahka Norgga rájá.