Mar adentro é un filme español biográfico-dramático de 2004 coescrito e dirixido por Alejandro Amenábar e protagonizado por Javier Bardem, Belén Rueda e Lola Dueñas. Rodado en Galicia, baséase na historia real de Ramón Sampedro, un escritor e ex-mariñeiro que quedou tetrapléxico logo dun accidente ocorrido durante a súa xuventude. Permanece prostrado nunha cama durante case 30 anos, situación pola que desexa morrer mediante a aplicación da eutanasia. O filme relata a loita de Sampedro para lograr que a lei recoñeza o seu dereito a morrer.^[1]

Resultou gañadora do Óscar ó mellor filme en lingua non inglesa na 77ª edición dos premios, entre outros numerosos premios.

O filme é unha produción de Sogecine e Himenóptero, en coprodución con UGC Images (Francia) e Eyescreen (Italia), coa colaboración de TVE, Canal+, TVG, Filmanova e o apoio de Eurimages/ICAA. A distribución internacional correu a cargo de Sogepaq.

O equipo é o mesmo que participou en The Others, coa incorporación de Jo Allen na maquillaxe, na cal investiron cinco horas diarias para o cambio físico de Javier Bardem. O filme rodouse durante doce semanas en Galicia, Cataluña e Madrid, cun orzamento de dez millóns de euros. A música foi composta por Amenábar, interpretada pola London Session Orchestra e contou coa colaboración do músico galego Carlos Núñez.^[2]