Estiska (estisce Eesti) je njewotwisny stat w sewjerowuchodnej Europje, kotryž słuša k baltiskim krajam. Stolica a najwjetše město je Tallinn, ležacy na sewjeru kraja při Baltiskim morju.

Po Prěnjej swětowej wójnje běše Estiska mjez 1918 a 1940 prěni raz njewotwisna a wot Druheje swětoweje wójny hač do lěta 1991 wot Sowjetskeho zwjazka okupěrowana. Wot awgusta 1991 je wona znowa njewotwisny stat, kotryž přisłuša kaž Letiska a Litawska wot lěta 2004 k Europskej uniji.

Wosebje na wuchodźe Estiskeje je poměrnje wulka ruskorěčna ludnosć žiwa.

Estiska mjezuje na wuchodźe z Ruskej, na juhu z Letiskej a na sewjeru a zapadźe z Baltiskim morjom. Wuchodna hranica k Ruskej, kotraž běži hłownje přez Peipuski jězor, pjaty najwjetši jězor Europy, je zdobom wonkowna hranica Europskeje unije.

Najwyša hora je Suur Munamägi (318m nad normalnej nulu) na juhowuchodźe Estiskeje a najniše městno je pobrjóh Baltiskeho morja. Před zapadnym brjohom Estiskeje nadeńdźetej so wulkej kupje Saaremaa a Hiiumaa.

Hlej tež: Lisćina narodnych parkow w Estiskej