Michigan (Lua-zmylk w package.lua, w lince 80: module 'Module:IPA/data' not found.) je US-ameriski zwjazkowy stat, kotryž leži na sewjeru kraja při Wulkich jězorach a kanadiskej hranicy. Ma něhdźe dźesać milionow wobydlerjow na 147.000 km² krajnej přestrjeni. Dalše 103.000 km² su wodowa přestrjeń. Stolica je Lansing z 115.000 wobydlerjemi, najwjetše město pak Detroit z něhdźe 700.000 wobydlerjemi. Mjeno Michigan pochadźa z rěče Ojibwe a woznamjenja „wulki jězor“. Michigan je historiske srjedźišćo ameriskeje awtomobiloweje industrije.

Stat wobsteji z dweju dźělow. Sewjerny dźěl nadeńdźe so na tak mjenowanej Hornjej połkupje mjez Hornim jězorom na sewjeru a Michiganskim jězorom na juhu a mjezuje na zapadźe z Wisconsinom a na wuchodźe – při rěce Saint Marys River – z kanadiskej prowincu Ontario. Južny a wjetši dźěl Michigana wobsteji z Delnjeje połkupy mjez Michiganskim jězorom na zapadźe a Huronskim jězorom na wuchodźe. Wón mjezuje na juhu z Ohiom a Indianu a ma pola Detroita mały podźěl na pobrjoze Erieskeho jězora. Tuž je Michigan jenički stat, kotryž leži při štyrjoch wot pjeć Wulkich jězorow. Móst přez 8 kilometrow šěroki Mackinacowy přeliw zwjazuje wobaj dźělej ze sobu.

Michigan přiwza so dnja 26. januara 1837 jako 26. stat do unije a ma přimjeno Great Lakes State („Kraj Wulkich jězorow“). Do toho bě teritorij dźensnišeho stata wot 17. lětstotka hač do lěta 1762 w francoskim wobsydstwje.

Něhdźe 21% wobydlerstwa je němskeho pochada, 11% irskeho, 9% jendźelskeho a 8% pólskeho.

• 👁 Karta z lěta 1718 z dźensnišim teritorijom zwjazkoweho stata
  
  Karta z lěta 1718 z dźensnišim teritorijom zwjazkoweho stata
• 👁 Wysokodomy w Detroiće
  
  Wysokodomy w Detroiće
• 👁 Wodopad na Hornjej połkupje
  
  Wodopad na Hornjej połkupje
• 👁 Mackinacowy móst mjez Hornjej a Delnjej połkupu
  
  Mackinacowy móst mjez Hornjej a Delnjej połkupu
• 👁 Přibrjóh Michiganskeho jězora
  
  Přibrjóh Michiganskeho jězora

1. ↑ United States Census Bureau: Trochowanja za 2015 (jendź.)

• Oficielne webstrony (jendź.)