Nag-away  kaniadto

CEBU, Philippines — Giangkon nila Heart Evangelista ug Angelica Panganiban nga duna sila'y gamay nga away kaniadto apan nagtagad ra pud sila dayon. Gikatahong nag-ugat kini sa ilang mga personal nga desisyon sa kinabuhi.

Todo daginot

Gibutyag sa Kapuso loveteam nga sila Sofia Pablo ug Allen Ansay nga grabe na gyud kamahal sa gasolina busa nagdaginot gyud sila og maayo. Kung susama nga kalihokan ang ilang tambongan, mag-usa na lang sila sa sakyanan aron makadaginot .

Dream home

Nahatagan na gyud og katumanan ang dream home sa celebrity couple nga sila Joyce Pring ug Juancho Trivino .Giisip nila kini sa nga bag-ong hugna sa ilang kinabuhi .“By God’s grace— we’ve started to move into our new home. While there are still a few things to fix, we’re so grateful for how far we’ve come,” suma pa ni Joyce .

Kiray naka-focus sa online selling

Temporaryong nipahuway sa showbiz ang komedyanteng aktres nga si Kiray Celis  gumikan kay  naka-focus siya karon sa online selling  .

Gitataw niya nga nananghid siya og tarong sa Sparkle GMA Artist Center.

Gipangandaman usab niya karon ang paghulma og kaugalingong pamilya.

Kahinumdoman nga gikasal sila Kiray ug ang iyang bana nga si   Stephan Estopia niadtong  Disyembre 13, 2025.

Wally nalambigit  sa motorcycle accident

Miarang-arang na ang  kondisyon sa  Eat Bulaga! co-host nga si Wally Bayola  human kini maaksidente sa motorsiklo sa Andaya Highway, Barangay Bel-Cruz, Lupi, Camarines Sur  niadtong Domingo.

Usa si  Wally sa mga miyembro sa  riders nga nibiyahe sa  Bicol Region sa dihang natumba ang gimaneho niya nga motorsiklo . Naangol ug nakabaton og bukol ang lawas sa komedyanteng TV host.

 “Sa mga nangungumusta kay Dabarkads Wally, maayos na po ang kanyang kalagayan.Maliban sa kaunting sugat at bukol, maayos at ligtas na po ang kanyang kalagayan,” Facebook post sa Eat Bulaga.

Kahinumdoman nga niadtong Mayo 2013, naaksidente pud si Wally  sa dihang nilihay siya sa truck,  samtang nagmaneho siya og  motorsiklo.

Music Travel Love mag- concert sa Cebu

Usa ka talagsaong gabii sa musika ang gipaabot sa mga Sugbuanon  atol sa pag-abot sa Music Travel Love aron mopasundayag  sa ilang mga awit .

Ang maong duo, nga nailhan sa ilang makapahupay nga tingog ug mga cover nga nakaabot na sa nagkalain-laing nasud, magdala sa ilang musika nga naghiusa sa mga kasingkasing sa lain-laing kultura ug dapit sa kalibutan.

Gilauman nga mapuno sa emosyon ug kahinam ang ilang pasundayag, nga maghatag higayon sa mga fans nga masinati ang ilang musika sa personal.

Ang konsiyerto pagahimoon sa Waterfront Cebu City Hotel & Casino karong Hunyo 27, 2026, alas-8 sa gabii.

Ang mga tiket mapalit sa SM Tickets outlets ug online.

Cup of Joe mapasalamaton sa mga Sugbuanon

Gibutyag sa banda nga Cup of Joe nga lahi  ra gyud ang mga Cebuano audience ug na-feel gyud nila ang mainitong suporta niini sa ilang mga gigama nga awit.

Sa usa ka presscon sa niaging adlaw, gibutyag sa mga miyembro sa banda nga taas gyud ang enerhiya sa mga Sugbuanon kun mo-perform sila ,   busa dako gyud ang ilang pasalamat niini.Nasayran nga gidumogan sa bagang dout sa  katawhan ang ilang konsyerto didto sa Waterfront Cebu City Hotel & Casino niadtong Sabado sa gabii.

Kahinumdoman nga nagmalampuson usab ang ilang konsyerto dinhi sa Sugbo sa niaging tuig, ug usa kini sa mga timailhan kung unsa sila ka pinangga sa mga Sugbuanon.

Suma pa ni  Gabriel Fernandez, lead guitarist sa banda, gihatagan gyud nila og bili ang ilang fans  nga wala gyud namiya kanila sukad sila nahulma isip campus band didto sa Baguio City.

Ang ubang miyembro sa banda mao sila Gian Bernardino ug Rapha Ridaosa   lead vocals, CJ Fernandez sa rhythm guitar, ug  Xen Gareza sa keyboards.

Gipaambit usab ni Rapha ang  sugilanon sa paghimo sa ilang kantang “Multo.” Matud pa niya, gisulat kini nila sa iyang igsoon nga si Red atol sa  panahon sa pandemya, diin taas-taas nga panahon ang pag-istar nila sa balay.

Dili na gyud mabangbang  ang kasikat sa awit nila nga “Multo”  , nga naglawig gihapon sa top streaming charts.